Nızam joybarına sholıw

Sońǵı jılları mámleketimizde qamaqtaǵılardıń huqıqları hám erkinliklerin kepillew, jınayat-atqarıw nızamshılıǵın xalıqaralıq huqıqtıń jazanı orınlaw hám qamaqtaǵılar menen múnásibette bolıwǵa tiyisli principleri hám normaları menen úylestiriw boyınsha sistemalı jumıslar alıp barılmaqta.
Biraq nızamshılıqqa aldıńǵı sırt el tájiriybesin inabatqa alǵan halda, qamaqtaǵılardıń nızamǵa boysınıw minez-qulqın, insanǵa, jámiyetke, miynetke, jámiyet turmısı qaǵıydaları hám dástúrlerine húrmet qatnasıǵın qollap-quwatlawǵa qaratılǵan normalardı kirgiziw zárúrligi payda bolmaqta.
Usı maqsette qamaqtaǵılardı ádep-ikramlılıq jaqtan dúzetiw nátiyjeliligin arttırıwǵa qaratılǵan nızam joybarı islep shıǵılıp, bul joybar menen Jınayat kodeksine kitap oqıwǵa tartıw arqalı qamaqtaǵılardı ádep-ikramlılıq jaqtan dúzetiw boyınsha jańa 74/1-statya kirgizilmekte.
Oǵan bola, tek ǵana jaza múddetin tolıq ótewi kerek bolǵan qamaqtaǵılarǵa tastıyıqlanǵan dizim boyınsha 1 kitap oqıǵan hám belgilengen tártipte imtixan tapsırǵan jaǵdayda jazasın 3 kúnge qısqartıw názerde tutılmaqta.
Sonday-aq, bul kodekstiń 73, 74-statyaları tiykarında bolsa jazanı ótewden múddetinen aldın shártli azat etiw yamasa jeńiliregi menen almastırıw máselesin sheshiw waqtında inabatqa alınıwı belgilenbekte.
Bunnan tısqarı, ózin-ózi tárbiyalaw jolı menen dúzeliw jolına ótkenin tastıyıqlawshı háreketlerdi orınlaw múnásibeti menen jaza múddetin qısqartıwdıń processuallıq tártipleri hám zárúr bolǵan ádebiyatlar menen támiyinlewdi belgilew boyınsha normalar názerde tutılmaqta.
Nızam joybarınıń qabıl etiliwi qamaqtaǵılardı sociallıq paydalı jumıslar menen shuǵıllanıwǵa tartıw arqalı ádep-ikramlılıq jaqtan dúzetiw jumıslarınıń nátiyjeliligin arttırıwǵa hám nızamnıń tárbiyalıq tásirin kúsheytiwge xızmet etedi.

M.Komilova, ÓzA