AQShtaǵı iri kitapxanalardan birinde Temuriyler dáwirine baylanıslı Quranı Kárim qoljazbasınıń jáne bir nusqası tabıldı, dep xabar bermekte Ózbekstandaǵı Islam civilizaciyası orayı.
Bul haqqında Franciya Joqarı Izertlewler orayı professorı Karim Ifrak Ózbekstandaǵı Islam civilizaciyası orayı menen onlayn ushırasıwda málim etti.
Karim Ifrak 2024-jılda ótkerilgen «Ullı ata-babalar miyrası – III Renessans tiykarı» VIII xalıqaralıq kongress hám Xalıqaralıq mádeniy miyras hápteliginde qatnasıp, Temuriyler dáwirinde kóshirilgen siyrek gezlesetuǵın reńli Quranı Kárim qoljazbası haqqında qızıqlı maǵlıwmatlar bergen edi.
Házirgi waqıtta bul qoljazba Islam civilizaciyası orayınıń joybarları qatarına kirgizilgen.
Ushırasıw dawamında Karim Ifrak AQShtaǵı iri kitapxanalardan birinde usı qoljazbanıń jáne bir nusqası tabılǵanın málim etti.
Sonday-aq, ol «Quranı Kárimniń Temuriyler dáwiri qoljazbaları» temasında Oray menen birge islesiwge tayar ekenligin bildirdi.
Sóylesiwde Islam civilizaciyası orayınıń úlken ilimiy xızmetkeri Azimjan Ǵafurov, xalıqaralıq baylanıslar bóliminiń baslıǵı Izzat Ibrohimov hám oray ilimiy xatkeri Rustam Jabborov qatnastı.
Karim Ifrak kelesi xalıqaralıq ánjumanlarda óziniń jańa tabılmaları menen qatnasatuǵının atap ótti. Sonday-aq, onıń «Islamnıń payǵambarı: Batıslı ullı ilimpazlar názerinde bes ásir» atamasındaǵı jańa kitabınıń baspaǵa tayarlanıp atırǵanı málim etildi.

N.Usmonova,
ÓzA