Búgingi kúnde respublikamızdıń barlıq ǵálle egilgen rayonlarında 2025-jıldıń ǵálle ónimi ushın bir qatar agrotexnikalıq ilajlar alıp barılmaqta.

Atap aytqanda, házirgi waqıtta ǵálle maydanlarında taraw wákilleriniń usınısları tiykarında qıs máwsiminde ǵálle egilgen atızlardı azıqlandırıw boyınsha keń kólemli jumıslar shólkemlestirilmekte.
– Dán hám salı ilimiy-óndirislik birlespesine qaraslı tájiriybe atızlarında Qaraqalpaqstan sharayatına beyimlestirilgen ǵálle tuqımları egilgen atızda turıppız. Bıyıl Qaraqalpaqstanda birinshi márte dep aytsaq ta boladı, ortasha 5-6 santimetrlik qalıń qar jawdı. Usı qardan tezirek utımlı paydalanıp qalıp, biyday egilgen maydanlardı azıqlandırıw jumısların alıp barıwımız kerek. Maqsetimiz qar eriymen degenshe, sol tóginniń qardıń erigen suwı menen egin tamırlarına jetip barıwın támiyinlew. Sebebi, sulfat-ommoniy tógini ásten tásir etiwshi, taslaǵan jerińde jatatuǵın tógin. Sonlıqtan da, biz bul tógindi erte berip, qardıń bar hár bir saatınan paydalansaq ótken jılı birlespemiz 45 centnerden ónim alǵan bolsa, bıyıl ónimdi 55-60 centnerge jetkeretuǵın jumıslardı islewimiz kerek. Ózimizdiń biyday sortlarımız shólge, shorǵa hám basqa da klimatımızdıń keri tásirlerine shıdamlı. Sonlıqtan da, biz bul sortlardı kóbirek egiwimiz kerek,-deydi usı birlespeniń Masaqlı egin selekciyası hám tuqımgershilik laboratoriyasınıń baslıǵı Orazbay Abdullaev.
Bul jumıslardıń nátiyjeli alıp barılıwın támiyinlew, sonday-aq, qıstıń sońǵı kúnlerinde jawǵan qardan nátiyjeli paydalanıw maqsetinde Nókis rayonındaǵı dán hám salı ilimiy-óndirislik birlespesi tárepinen arnawlı texnikalar járdeminde ǵálle maydanların azıqlandırıw ilajları ámelge asırılmaqta.

Á.Jiyemuratov,
Qaraqalpaqstan xabar agentligi.