AOKAda Ishki isler ministrligi Mámleketlik jol háreketi qáwipsizligi xızmeti basshısınıń qatnasıwında baspasóz ánjumanı ótkerilmekte.

Onda «Jol háreketi qáwipsizlik sisteması jetistiriliwi múnásibeti menen Ózbekstan Respublikasınıń Jınayat, Jınayat-processual kodekslerine hám Ózbekstan Respublikasınıń Hákimshilik juwapkershilik haqqındaǵı kodeksine qosımsha hám ózgerisler kirgiziw haqqında»ǵı nızamnıń mazmunı haqqında maǵlıwmat berildi.
Atap ótilgenindey, járiyma balları 12 baldan artsa, aydawshı transport quralın basqarıw huqıqınan ayırıladı
Nızam menen, Hákimshilik juwapkershilik haqqındaǵı kodekske kirgizilgen qosımshalarǵa bola tómendegiler ushın hákimshilik juwapkershilik belgilendi:
Jol háreketi qaǵıydabuzarlıqlar boyınsha esaplanatuǵın balları belgilengen muǵdardan artqanı ushın hákimshilik jaza qollanılıwı;
Onda:
-Belgilengen huqıqbuzarlıqlar islengeni ushın transport quralınıń aydawshısına usı huqıqbuzarlıqlarda názerde tutılǵan tiykarǵı jaza menen birge járiyma balları esaplanadı. Bunda islengen hár bir huqıqbuzarlıq ushın esaplanatuǵın járiyma balınıń eń joqarı muǵdarı 2 balldan artpawı kerek.
-Járiyma balları belgilengen huqıqbuzarlıqlardan biri birinshi ret islengen kúnnen baslap bir jıl dawamında esaplap barıladı. Bul statyanıń birinshi bóliminde názerde tutılǵan huqıqbuzarlıqlar ushın esaplanǵan járiyma balları bir jıl ótkennen soń transport quralınıń aydawshısınan avtomatlastırılǵan túrde sheshiledi.
-Esaplanǵan járiyma balları bir jıl dawamında 12 balldan artqan jaǵdaylarda, sońǵı ret islengen huqıqbuzarlıq ushın belgilengen tártipte qosımsha jaza boyınsha aydawshı transport quralların basqarıw huqıqınan ayırıladı. Bunday huqıqtan ayırıw múddeti 6 aydan az bolmawı belgilendi.

ÓzA