Ózbekstan Respublikası Prezidenti Shavkat Mirziyoev 24-fevral kúni Oman Patshalıǵı sırtqı isler ministri Badr bin Hamad al-Busaidiydi qabıl etti.

Sóylesiw aldında ministri mámleketimiz basshısına Oman Patshası Haysam bin Toriq Ol Saidtiń qızǵın sálemin hám xatın jetkerdi.
Eki mámleket arasındaǵı óz-ara paydalı birge islesiwdi jáne de keńeytiw, bárinen burın, sawda-ekonomikalıq hám investiciya-qarjı tarawlarındaǵı sheriklik potencialın ámelge asırıw máseleleri kórip shıǵıldı.
Uyımlararalıq hám isbilermenlik qatnasıqları jedelleskeni qanaatlanıwshılıq penen atap ótildi. Óz-ara tovar almasıw kólemi, birgeliktegi kárxanalardıń sanı artpaqta, eki mámleket jetekshi kompaniyalarınıń qatnasıwındaǵı biznes ilajları turaqlı ótkerilmekte.
Ózbekstan-Oman investiciya kompaniyası portfelin jańa kooperaciya joybarları esabınan keńeytiwge ayrıqsha itibar qaratıldı.
Usı jıldıń aprel ayında Húkimetleraralıq komissiyanıń gezektegi májilisi hám birgeliktegi biznes forumı ótkeriledi.
Bunnan tısqarı, parlamentleraralıq qatnasıqlardı, mádeniy-gumanitarlıq almasıwdı rawajlandırıw, tikkeley aviaqatnawlardı jolǵa qoyıw áhmiyetli ekenligi atap ótildi.
Regionallıq kún tártibi, sonıń ishinde, bıyılǵı jıl may ayında Samarqand qalasında ótkeriletuǵın “Oraylıq Aziya – Qoltıq mámleketleri” sóylesiwiniń ekinshi sammitine tayarlıq boyınsha pikir alısıldı.

ÓzA