Sociallıq tarmaqlarda transport qurallarınıń tezligin arttırıw qaǵıydabuzarlıǵı («radar») ushın járiyma muǵdarınıń kóbeytilgeni haqqında xabarlar tarqalmaqta. Bul jaǵdayǵa Ishki isler Bas basqarması baslıǵınıń baspasóz xatkeri aydınlıq kirgizdi.

Xabar etiliwinshe, bul maǵlıwmatlar haqıyqatlıqqa pútkilley tuwra kelmeydi. Huqıq qorǵaw uyımları bul túrdegi qaǵıydabuzarlıq ushın belgilengen járiymalar muǵdarı ózgermegenin málim etti.
«Málimleme tarqatıwda rásmiy dereklerge tiykarlanıwdı usınıs etemiz», delinedi xabarda. Járiymalar muǵdarı hám háreket qaǵıydalarındaǵı ózgerisler tek ǵana rásmiy xabarlar arqalı járiyalanadı hám puqaralar usı dereklerge iseniwi kerekligi usınıs etiledi.
Usı múnásibet penen, sociallıq tarmaqlarda tarqatılıp atırǵan tiykarsız xabarlarǵa isenbew hám olardı tarqatpaw zárúr ekenligi atap ótildi.

Qaraqalpaqstan xabar agentligi