Nókis garnizonındaǵı Ruwxıylıq hám aǵartıwshılıq orayında “Men úlgili áskeriy shańaraqtıń biykesimen!” súreni astında “Bárekalla, hayallar” tańlawınıń Arqa-Batıs áskeriy okrugi basqıshı bolıp ótti.

Mámleketimizde jámiyettiń ajıralmas bólegi esaplanatuǵın zamanagóy shańaraqtı rawajlandırıw, shańaraq institutın jáne de bekkemlew, ulıwma insanıylıq, milliy úrp-ádet hám dástúrlerimizge tereń húrmet hám sıylasıqtı bekkemlew, áskeriy xızmetkerlerdiń shańaraq aǵzalarınıń mádeniy dem alısların támiyinlew, olardıń ruwxıy dúnyaǵa kózqarasların keńeytiw, intellektuallıq potencialların jáne de arttırıw maqsetinde shólkemlestirilip atırǵan “Bárekalla, hayallar” tańlawında jámi altı qatnasıwshı saxnada ózleriniń sheberligin kórsetti.

Ózbekstan Respublikası Prezidentiniń 2022-jıl 7-marttaǵı “Shańaraq hám hayal-qızlardı sistemalı qollap-quwatlawǵa baylanıslı jumıslardı jáne de jedellestiriw ilajları haqqında”ǵı pármanınıń orınlanıwın támiyinlew, áskeriy xızmetkerlerdiń shańaraq aǵzalarınıń sanasında tariyxımız, milliy úrp-ádet hám dástúrlerimizge tereń húrmet sezimin oyatıw, olardıń arasında salamat básekilik ortalıǵın jaratıw maqsetinde Qorǵanıw ministrligi bólimlerinde ótkerilip atırǵan “Bárekalla, hayallar” tańlawı búgingi kúnde keń tarqalıp, qatnasıwshılar hám tamashagóylerdiń mehirin iyelep úlgerdi.

Tańlaw rejesinde belgilengen qaǵıydalarǵa bola shańaraq biykeleri “Men baxıtlı hayalman”, “Sheber úy biykesi”, “Darts”, “Hayal – gózzallıq tımsalı”, “Sheber hayal” hám “Bahru bayt” shártleri boyınsha óz-ara bellesti.

Jarıstıń “Men baxıtlı hayalman” shártinde qatnasıwshılar kórkem óner sheberligin kórsetip, qosıqlar hám xalıq oyınları járdeminde óz shańaraqların tanıstırıwı kerek boldı.

“Sheber úy biykesi” dep atalǵan tańlawdıń ekinshi shártinde qatnasıwshılar reńli iyirilgen jipler menen pishiw usılında hár qıylı bezewlerdi toqıdı.

“Uqıplı hayal” hám “Baxru bayt” shártlerinde qatnasıwshılar tóreshiler tárepinen berilgen qosımsha shártti tez hám ziyreklilik penen orınlawı,  milliy hám estrada baǵdarındaǵı qosıqlardan úzindilerdi janlı atqarıwı kerek boldı. Al, “Hayal – gózzallıq tımsalı” shártinde qatnasıwshı hayallar milliy shash túydegin jaratıw boyınsha bellesti. “Darts” dep atalǵan shártte olar sport menen shuǵıllanatuǵınlıǵın 3 metrlik aralıqtan bes dana nayzanı nıshanǵa ılaqtırıw menen kórsetti.

Qatnasıwshılardıń shıǵıwları, tańlaw shártlerin orınlawdaǵı ziyrekliligi, shaqqanlıǵı tóreshiler tárepinen bahalanıp barıldı.

Tańlawda 3-dárejeli serjant Sherzod Eshboevtıń ómirlik joldası Gulsanam Jonibekova okrug basqıshında sıylı 1-orındı qolǵa kirgizip, Qorǵanıw ministrligi basqıshına jollama aldı.

“Bárekalla, hayallar” tańlawınıń barlıq qatnasıwshıları nominaciyalar boyınsha áskeriy okrug sárkardalıǵınıń húrmet jarlıqları hám estelik sawǵaları menen sıylıqlandı. Sonıń menen birge, olarǵa Kásiplik awqamınıń da estelik sawǵaları tapsırıldı.

Á.Jiyemuratov,

Qaraqalpaqstan xabar agentligi.