Arqa-Batıs áskeriy okrugi áskerleri sárkardalıǵınıń baslaması menen kúlki ustası Avaz Oxunnıń qatnasıwında Nókis garnizonındaǵı Ruwxıylıq hám aǵartıwshılıq orayında “Jańasınan bar” atlı koncert baǵdarlaması qoyıp berildi,-dep xabar bermekte okrugtiń baspasóz xızmeti.

Kúlkige bay ótken yumor-satiralıq baǵdarlama qıs máwsiminiń usınday kúnlerinde kewillerge jıllılıq alıp kirip, este qalarlıqtay boldı.
Áskeriy xizmetkerler hám olardıń shańaraq aǵzalarınıń dem alıwın mazmunli shólkemlestiriw, mádeniy dem alıwın támiyinlew maqsetinde ótkerilgen ilajda kúlki ustası óziniń qızıqlı hám mazmunǵa bay áńgimeleri menen qatnastı.
Avaz Oxunnıń ótkir áńgimelerinde ápiwayılıq, insanlardıń turmısınan alınǵan jaǵdaylar qamtıp alınǵan. Er-hayal qatnasıǵı, balalar sáwbetlesiwi, jumıstaǵı jaǵdaylar, turmıstıń ashshı hám shiyrin maǵlıwmatları – bulardıń barlıǵı sóz ustasınıń bay dóretiwshilik repertuarınan orın alǵan.
– Koncert oǵada qızıqlı ótti,-deydi mayor Z.Alijonovtıń ómirlik joldası Diyora Alijonova. – Perzentlerim de Avaz Oxunnıń ıqlasbentleri. Ol basqa dóretiwshilerden turmıslıq pikirleri menen ajıralıp turadı. Hátteki, yumorında da tárbiyalıq áhmiyetke iye bolǵan kóplegen sózlerdi tabıwıńız múmkin.
Áskeriy okrug sárkardasınıń orınbasarı, podpolkovnik Lochin Rasulov dóretiwshige jeke quram atınan óz minnetdarshılıǵın bildirip, qaraqalpaq milliy ornamenti túsirilgen estelik sawǵaların tapsırdı.
Koncert sońında belgili artist penen áskeriy okrug tariyxı muzeyine sayaxat shólkemlestirildi.

Qaraqalpaqstan xabar agentligi