Prezidentimiz Shavkat Mirziyoevtiń basshılıǵında 13-fevral kúni olimpiada hám paralimpiya háreketi, qánigelestirilgen hám ǵalabalıq sporttı jańa basqıshqa alıp shıǵıw hám xalıqtıń fizikalıq belsendiligin arttırıw ilajlarına baǵıshlanıp ótkerilgen videoselektor májilisinde wazıypalar belgilenip, 18-fevral kúngi Ózbekstan suw sportı Federaciyasınıń gezektegi konferenciyasında da usı máselede bir qatar tapsırmalar berildi.

Belgilengen wazıypa hám tapsırmalardıń orınlawın támiyinlew maqsetinde usı jıl 21-fevral kúni Ózbekstan kásiplik awqamları Federaciyasınıń Qaraqalpaqstan Keńesi májilisler zalında Ózbekstan suw sportı Federaciyası Qaraqalpaqstan bóliminiń gezektegi májilisi bolıp ótti.
Májiliste Ózbekstan kásiplik awqamları Federaciyasınıń Qaraqalpaqstan Keńesiniń baslıǵı, Ózbekstan suw sportı Federaciyası Qaraqalpaqstan bóliminiń baslıǵı U.Jalmenov, Qaraqalpaqstan Respublikası Sport ministrligi hám Ózbekstan suw sportı Federaciyası Qaraqalpaqstan bóliminiń qánigeleri, júziw boyınsha trener-ustazlar qatnastı.
Májiliste Ózbekstan suw sportı Federaciyası Qaraqalpaqstan bóliminiń búgingi kúnge shekem alıp barılǵan jumısları hám júziw basseynleriniń jaǵdayı, sonday-aq, suw sportı jarıslarına tayarlıq dárejelerin jáne de arttırıw, sportshılarımızdı jarıslarǵa alıp shıǵıw hám suw sportına jaslardı keńnen qamtıw máseleleri haqqında maǵlıwmatlar berilip, keń túrde dodalandı.
Ilaj dawamında Ózbekstan suw sportı Federaciyası Qaraqalpaqstan bóliminiń jumısların shólkemlestiriw hám háreketleniw «Jol kartası»n islep shıǵıw boyınsha máseleler belgilep alındı.
Sonday-aq, júziw sport túri boyınsha ótkeriletuǵın chempionat, kubok ushın ótkeriletuǵın jarıslarǵa tayarlıq kóriw hám jarıs nátiyjelerine juwapker etip Ózbekstan suw sportı Federaciyası Qaraqalpaqstan bólimine Islam Qudaybergenov, Qaraqalpaqstan Respublikası boyınsha aǵa treneri hám jaslar treneri etip Javohir Matrzaev saylandı.
Ilaj juwmaǵında qatnasıwshılardıń pikir-usınısları tıńlanıp, olar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.