2025-jıl 20-fevral kúni qabıl etilgen Ózbekstan Respublikasınıń Nızamı (ÓRN-1032-sanlı) menen «Mámleketlik bajı haqqında»ǵı Nızamǵa bir qatar áhmiyetli qosımsha hám ózgerisler kirgizildi. Bul ózgerisler ıssılıq hám elektr energiyasın jetkerip beriw tarawı hám sırt el kommerciyalıq shólkemleriniń akkreditaciyasına baylanıslı máselelerdi qamtıp aldı.

Nızamǵa muwapıq, ıssılıq hám elektr energiyasın jetkerip beriwshilerge tiyisli puqaralıq isleri boyınsha hám ekonomikalıq sudlarǵa dawa arza, arza yaki shaǵım menen múrájat etilgende mámleketlik bajını tólewden azat etiw tártibi engizildi. Bul ózgeris ıssılıq hám elektr energiyasın jetkerip beriw tarawındaǵı tartıslı máselelerdi sud arqalı sheshiwdi jeńilletiwge qaratılǵan. Bul norma, jetkerip beriwshilerdiń huqıqların qorǵaw hám olardıń qarızların óndiriw procesinde artıqsha qarjılay júkti azaytıwǵa xızmet etedi.
Sonıń menen birge, egerde ıssılıq hám elektr energiyasın jetkerip beriwshiler tárepinen berilgen dawa arzalar tolıq yaki bir bólegi biykar etilse, bul jaǵdayda olardan mámleketlik bajı óndiriliwi belgilendi. Bul qaǵıyda sud isin ádillik penen sheshiw hám tárepler arasındaǵı qarjı juwapkershiligin támiyinlew maqsetinde kirgizildi.
Nızam menen sırt el kommerciyalıq shólkemleriniń Ózbekstan aymaǵındaǵı wákilxanaların akkreditaciyalaw tártibine de anıqlıq kirgizildi. Endi bul shólkemler hár bir jıl ushın akkreditaciyaǵa baylanıslı mámleketlik bajını tólewi shárt boladı. Bul bolsa sırt el shólkemleriniń mámlekettegi jumısın muwapıqlastırıw hám qarjılay tártip-qaǵıydanı kúsheytiwge qaratılǵan.
Nızam rásmiy járiyalanǵan kúnnen baslap kúshke kiredi hám usı tarawlarda jumıs alıp barıp atırǵan shólkemler hám puqaralar ushın huqıqıy tiykar bolıp xızmet etedi. Bul ózgerisler energetika tarawındaǵı qatnasıqlardı tártipke salıw hám sırt el shólkemleri menen birge islesiw processlerin jaqsılawǵa qaratılǵan áhmiyetli qádem boldı,-dep málimleme beredi xs.uz saytı.

Qaraqalpaqstan xabar agentligi