Qaraqalpaqstan Respublikası aymaqlıq balalar medicinalıq reabilitaciya orayında Densawlıqtı saqlaw ministrligi tárepinen ǵalaba xabar qurallarınıń wákilleri ushın press-tur shólkemlestirildi. Dáslep orayda baspasóz konferenciyası ótkerilip, onda qatnasıwshılarǵa usı oray direktorı G.Nazarımbetova tárepinen 2024-jıl daӯamında ámelge asırılǵan jumıslar haqqında keń túrde maǵlıwmatlar berildi.

Qaraqalpaqstan Respublikası aymaqlık balalar medicinalıq reabilitaciya orayı Ózbekstan Respublikası Prezidentiniń 2022-jıl 7-iyuldegi «Qaraqalpaqstan Respublikasında 2022-2024-jıllarda xalıqtıń salamatlıǵın qorǵawdı jáne de kúsheytiw haqqında”ǵı qararına muwapıq shólkemlestirilgen bolıp, 2023-jıldıń 21-fevralınan baslap Qaraqalpaqstan Respublikası boyınsha sozılmalı keselligi hám mayıplıǵı bar 18 jasqa shekemgi balalarǵa medicinalıq reabilitaciyalıq xızmet kórsetip kelmekte. Oray 120 orınǵa mólsherlengen bolıp, tórt bólimnen, atap aytqanda, hár biri 30 orınlıq travmatologiya, pulmonologiya, nevrologiya hám kardiorevmatologiya bólimlerinen ibarat.
Oraydıń tiykarǵı ӯazıypalarınıń biri 18 jasqa shekemgi mayıp hám naӯqas balalardıń jasaӯ sharayatın jaqsılaӯ, sonıń menen birge, densaӯlıǵın qayta tikleӯ (reabilitaciya) arqalı emleӯ, mayıplılıqtıń aldın alıӯ, keselliklerdiń profilaktikası hám medicinalıq reabilitaciya boyınsha joqarı texnologiyalarǵa tiykarlanǵan qánigelestirilgen járdemge mútájlikti qanaatlandırıӯdan ibarat. Usı ӯazıypalardı ámelge asırıӯ maqsetinde orayda zamanagóy medicinalıq áspap-úskeneler menen támiyinlengen laboratoriya, fizioterapiya bólimleri shólkemlestirilgen, tar taraӯ qánigelerinen ibarat otolaringolog, okulist, psixoterapevt, stomatologlar jumıs islemekte.
Qaraqalpaqstan Respublikası boyınsha búgingi kúnde 18 jasqa shekemgi balalar sanı 676485ti, solardan mayıplılıǵı bolǵan balalardıń sanı 11683ti hám sozılmalı keselligi bar balalar sanı 33527 ni quraydı. Qaraqalpaqstan Respublikası aymaqlıq balalar medicinalıq reabilitaciya orayında 2024-jıl daӯamında mayıplıǵı hám sozılmalı keselligi bar 3121 bala emlenip shıqqan.
Orayǵa 2024-jıl daӯamında mayıplıǵı hám sozılmalı keselligi bar 3121 bala qabıl etilgen. Olardıń 528 (16,9%)in mayıplıǵı bar hám 2593 (83,1%)in sozılmalı keselligi bar balalar quraǵan.
Birlespeniń laboratoriya bѳlimi zamanagѳy áspab-úskeneler menen támiyinlengen bolıp, onda emlewxananıń bѳlimlerinde stacionar sharayatta jatıp emlenip atırǵan nawqaslardan ulıwma klinikalıq (ulıwma sidik analizi, kaprologiya, yayca glist), gemotologiyalıq (ulıwma qan analizi, qannıń uyıwshılıǵı, trombocit muǵdarı), bioximiyalıq analizler (mochevina, kreatinin, ulıwma belok, glyukoza, ALT, AST, ulıwma bilirubin, kalciy, temir) alınıp, tekseriw jumısları alıp barıladı.
– Qaraqalpaqstan Respublikası Joqarǵı Keӊesi Prezidiumınıӊ 2023-jıl 10-noyabr kúngi arnawlı qararına muӯapıq, oraydı jańadan úskeneleӯ ushın 2 milliard 270 mln sum muǵdarında qarjı ajratıldı. Usı qarjılardıń esabınan oraydıӊ laboratoriya bólimine 15 túrdegi medicinalıq apparatlar alındı. Atap aytqanda, ЕKG, UZI, sanlı rentgen, TMS, ЕNMG apparatları, al fizioterapiya bólimine 3 túrdegi apparat satıp alınıp, balalarǵa medicinalıq xızmet kórsetiwdiń sapası hám nátiyjesi ádewir jaqsılandı,-deydi oray direktorı G.Nazarımbetova.
Sonday-aq, “Mehirli insanlar” qorı jámááti menen birgelikte alıp barılǵan jumıslar nátiyjesinde Vashington qalasındaǵı Ózbek diasporası tárepinen berilgen qarjılay járdemniń arqasında oraydıӊ nevrologiya bóliminiӊ balalar dem alıӯ xanası hám LFK xanası zaman talabına say úskeneler menen támiyinlenip berildi.
Olar shved diyӯalshası, vertikalizatorlar, reabilitaciyalıq stul, júriӯ maslaması, embekleӯ ushın arnaӯlı toplam, sensorlı júriӯ jolı, jumsaq moduller toplamı, velotrenajyor, fitbollar, júriӯdi tikleӯ trenajyorı balalar batuti hám t.b.

Press-turda qatnasıwshılar orayda jaratılǵan sharayatlar menen tanıstırıldı. ЕKG, sanlı rentgen apparatı, UFO «Solnıshko», elektroforez Zinga, darsonval, elektroforez «Potok», svetovaya vanna, sollyuks, stomatologiyalıq qurılma, UZI, TMS, ЕNMG apparatları ornatılǵan xanalardı kórip, onda emlenip atırǵan balalar hám ata-anaları menen sáwbetlesti.
– Men Kegeyli rayonınan qızımdı emletiw ushın bul jerge jetinshi márte keliwim. Emlewxana shıpakerleri hám miyirbiykeleri qızıma jaqsı qarap atır. Házir tok penen emlew apparatına túsirip atır. Qızımnıń jaǵdayı burınǵıdan ádewir jaqsılandı. Qolları hesh nárseni sezbeytuǵın edi. Házir sezip háreket etiwge urınıp atır. Men bunnan oǵada quwanıshlıman, shıpakerlerden minnetdarshılıǵım sheksiz,-deydi G.Rawajova.
Maǵlıwmat ushın atap ótetuǵın bolsaq, reje boyınsha orayda 1 ayda 252 naӯqas bala 3396 orın kúnlerinde 13,6 kún daӯamında stacionar sharayatında emlenip shıǵıӯı kerek bolsa, 2024-jıl daӯamında 3121 (104%) naӯqas bala 40354 (98,2%) orın kúnlerinde 12,9 (94,9%) kún daӯamında stacionar sharayatında emlenip shıqkan.
Press-tur dawamında qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.