Sońǵı jılları elimizde sporttı rawajlandırıw hám ǵalaba en jaydırıwǵa keń imkaniyatlar jaratılıp, bul baǵdarda ámeliy ilajlar alıp barılmaqta. Ásirese, jaslarımız arasınan elimizdiń bayraǵın dúnyaǵa tanıtatuǵın sportshılar jetilisip shıǵıp, olar Aziya hám jáhán chempionatları menen olimpiada oyınlarında Watanımız abırayın pútkil dúnyaǵa tanıtıp kelmekte.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev sport tarawı wákilleri, juwapkerler, federaciya basshıları menen ushırastı.

Ushırasıwda 2024-jılı sport mekteplerinde sportshı-jaslardı tayarlawda ámelge asırılǵan ilajlar hám aldaǵı wazıypalar, sonday-aq, sport federaciyalarınıӊ jumısları haqqındaǵı máseleler qarap shıǵıldı.
Joqarǵı Keńes Baslıǵı óz sózinde húrmetli Prezidentimizdiń Ózbekstan Milliy Olimpiada komitetiniń baslıǵı lawazımına saylanǵanı óz gezeginde aymaq hám taraw basshılarına úlken juwapkershilik júkleytuǵınlıǵın, jaratılıp atırǵan imkaniyatlardan paydalanıp tarawda bunnan da joqarı nátiyjelerdi qolǵa kirgiziw zárúrligin ayrıqsha atap ótti.
Ilajda bul baǵdarda óz wazıypasın atqarıwda ayırım mákeme hám federaciya basshılarınıń nemquraydılıq penen qarap atırǵanlıǵı sınǵa alındı.
Sonday-aq, ushırasıwda elimiz jasları arasınan xalıqaralıq dárejedegi jarıslarda, olimpiada oyınlarında joqarı nátiyjelerge erisetuǵın sportshılardı jetilistirip shıǵarıw ushın jáne qanday ilajlardı alıp barıw kerekligi boyınsha taraw wákilleriniń pikir-usınısları tıńlanıp, wazıypalar belgilendi.
Ótkerilgen ilajǵa Qaraqalpaqstan Respublikası Ministrler Keńesiniń Baslıǵı F. Еrmanov qatnastı.

Qaraqalpaqstan xabar agentligi