Senattıń tórtinshi jalpı májilisinde «Kredit málimlemesi almasıwı haqqında»ǵı Ózbekstan Respublikası nızamına kredit tarawındaǵı qatnasıqlardı jáne de jetilistiriwge qaratılǵan ózgerisler hám qosımshalar kirgiziw haqqında»ǵı nızam kórip shıǵıldı.

Prezidentimiz tárepinen mámleketimizde xalıqtıń qarjı xızmetlerinen paydalanıwın jeńillestiriw, bank xızmetleri kólemin keńeytiw hám sapasın arttırıw, kreditler beriw tártip-qaǵıydaların ápiwayılastırıw boyınsha ilajlar ámelge asırılıp atırǵanı atap ótildi.
Onlayn kreditler alıw imkaniyatınıń keńeygeni xalıqqa úlken qolaylıq jarattı. Sonıń menen birge, puqaralardıń atına olardıń xabarısız kreditlerdi rásmiylestiriw hám berilgen qarjılardı aldawshılıq usılların qollanǵan halda ózlestiriw jaǵdayları ósip barmaqta. Bul bolsa, puqaralardıń kreditlew tarawındaǵı máplerin qorǵawdıń huqıqıy mexanizmlerin jetilistiriwdi talap etpekte.
Maǵlıwmatlarǵa qaraǵanda, 2023-jılda kiberqáwipsizlik baǵdarında 6 mıń 455 jınayat júz bergen bolıp, olardıń 76 procenti (4 mıń 923) puqaralardıń bank plastik kartalarındaǵı pullardı qolǵa kirgiziw menen baylanıslı bolǵan.
Sonday-aq, 2024-jıl dawamında kiberqáwipsizlik baǵdarında (bank kartası menen baylanıslı jaǵdaylar boyınsha) puqaralar tárepinen 57 mıń 480 múrájat jollanǵan bolıp, sonnan 36 mıń 444i urlıq hám 21 mıń 36 sı aldawshılıq jınayatı menen baylanıslı.
Nızamda puqaranıń kredit kelisimi dúziwi qadaǵan etilgen shaxslar reestrinde bar ekenligi yamasa joq ekenligi, qadaǵan etiw (qadaǵan etiwdi biykarlaw) haqqındaǵı arzanıń jaǵdayı haqqında málimleme alıw hám beriwde kredit byurolarına huqıq hám minnetlemeler, olarǵa qollanılatuǵın ilajlar hám sankciyalar da sáwlelendirilmekte.
Senatorlar maqullaǵan nızam puqaralar qatnasıwısız yamasa xabarısız kredit kelisimin rásmiylestiriw menen baylanıslı aldawshılıq jaǵdaylarınıń aldın alıw maqsetinde kredit byurosına arza kirgiziw arqalı puqara menen kredit kelisimin dúziwdi qadaǵan etiw imkaniyatın beredi.

N.Abduraimova,
N.Haydarov (súwret), ÓzA