«Óz aldına ullı maqsetler qoyǵan xalıq tek salamat hám kúshli bolǵan jaǵdayda ǵana gózlegen sheklerine erise aladı. El-xalıqtıń salamat bolıwı, úlken jumıslar isley alıwında bolsa, álbette, denetárbiya hám sporttıń áhmiyeti teńsiz»,-degen edi elimiz Prezidenti Sh.Mirziyoev 2028-jılǵı Olimpiada hám Paralimpiada oyınlarına tayarlıqtı kúsheytiw, ǵalabalıq sporttı jańa basqıshqa alıp shıǵıw máselelerine baǵıshlanǵan videoselektor májilisinde.
Haqıyqatında da, búgin mámleketimiz dúnyaǵa ashıq, sociallıq hám ekonomikalıq rawajlanǵan mámleket – Jańa Ózbekstandı qurıw boyınsha óz aldımızǵa úlken maqsetler qoymaqta.
Hár bir insan, hár bir ata-ananıń ármanı hám niyeti fizikalıq hám ruwxıy jaqtan bárkamal áwladtı tárbiyalaw bolıp esaplanadı. Oǵan bolsa denetárbiya hám sportsız erisip bolmaydı.
Ózbekstan mámleketlik denetárbiyası hám sport universiteti Nókis filialında filialdıӊ ilimiy potencialın arttırıw boyınsha alıp barılıp atırǵan jumıslar, kórsetkishler boyınsha ǵalaba xabar quralları xızmetkerleriniń qatnasıwında baspasóz brifingi bolıp ótti.
Brifingte Ózbekstan mámleketlik denetárbiyası hám sport universiteti Nókis filialı direktorınıń ilimiy isler hám innovaciyalar boyınsha orınbasarı Islambek Mambetnazarov 2023-2024-oqıw jılında sırt ellerdegi abıraylı joqarı oqıw orınları menen xalıqaralıq birge islesiwler boyınsha dúzilgen shártnamalar, ilimiy joybarlar, jergilikli, xalıqaralıq grantlar hám investiciyalar, professor-oqıtıwshılardıӊ ilimiy baǵdarda alıp barıp atırǵan jumısları haqqında jurnalistlerge keń túrde maǵlıwmatlar berip ótti.
-Filialdıӊ ilimiy potencialı aldınǵı jılları 22 procentti quraǵan bolsa, bul kórsetkish búgingi kúnge kelip 30 procentke jetti,-deydi I.Mambetnazarov- Bul álbette, professor-oqıtıwshılarmızdıӊ ilim jolında islep atırǵan ilimiy izzertlew jumıslarınıń jemisi bolıp esaplanadı.
Filialda xalıqaralıq birge islesiw baylanısları sheńberinde, Qazaqstan, Qırǵızstan, Belarus, Bashqurtstan, Vengriya Respublikalarınıń joqarı oqıw orınları menen birge islesiwdi rawajlandırıwǵa baylanıslı memorandumǵa qol qoyılıp, usı shártnamalar tiykarında kóplegen ilajlar ótkerildi. Mısalı, 17-yanvar kúni TOP-1000 lıqqa kirgen M.Áwezov atındaǵı Qubla Qazaqstan izertlew universitetiniń oqıtıwshısı, filologiya ilimleriniń kandidatı, docent Aynura Jiyenbekova «Mádeniyat hám jámiyettegi ruwxıy baylanıslar tarawındaǵı iskerliktiń ornı» temasında onlayn-seminar ótkergen bolsa, 2024-jılı 27-29-mart kúnleri Belarus Respublikası Ya.Kupala atındaǵı Grodno mámleketlik universitetiniń professorı Avak Mixaylovich Vartanyan hám TOP-1000 lıqqa kirgen Abay atındaǵı Qazaqstan milliy pedagogikalıq universiteti professorı Shamurat Orazov, sonday-aq, 8-10-may kúnleri Poles mámleketlik universitetiniń docenti Vitaliy Vladimirovich Marinich filialımızdıń «Jeke gúres hám tábiyǵıy pánler» hám «Denetárbiyası hám gumanitar pánler» kafedralarında saatlıq tiykarda sabaqlar hám seminar-treningler ótkerdi.
Sonday-aq, 2024-jıldıń 28-noyabr kúni TOP-1000 lıqqa kirgen L.N.Gumilyov atındaǵı Evraziya milliy universiteti docenti Ulbosın Marchibaeva «Qazaqstan hám Ózbekstannıń milliy sport túrleri: baǵdarlamaları hám zamanagóyligi» temasında seminar shólkemlestirildi.

Usılar menen bir qatarda, filialda ilimiy hám ilimiy-texnikalıq ilajlardıń nátiyjelerin járiyalap barıw, filialdıń ilimiy potencialın joqarılatıw ushın kóplegen ilajlar ótkerilgen. Atap aytqanda, 2024-jılı filialda 1 xalıqaralıq hám 3 respublikalıq ilimiy konferenciya shólkemlestirilip, olarǵa 2700 den aslam qánige qatnasqan. Sonıń ishinde aytıp ótetuǵın bolsaq, 17-18-aprel kúnleri «Teoriya hám ámeliyattaǵı aktual máseleler» temasında respublikalıq konferenciya, 16-17-may kúnleri «Dene tárbiyası hám sport tarawında jetik qánigeler tayarlawda sport psixologiyası hám pedagogikası hám de innovaciyalıq bilimlendiriw texnologiyalarınıń áhmiyeti» temasındaǵı xalıqaralıq konferenciya hám 5-6-noyabr kúnleri «Jas áwladtıń tárbiyasında milliy sport oyınlarınıń áhmiyeti: másele hám sheshimleri» temasında respublikalıq konferenciyalar, 6-dekabr kúni «Sport oyınları túrleri, teoriyası hám ámeliyatındaǵı áhmiyetli máseleler» temasında respublikalıq konferenciyalar ótkerildi.
-Ótkerilgen ánjumanlarǵa respublikadaǵı joqarı oqıw orınları hám sırt ellerden Germaniya, Mongoliya, Hindstan, Qazaqstan, Belarus mámleketlerinen kóplegen ilimpazlar, professor-oqıtıwshılar hám filialdıń pedagog xızmetkerleri, studentler qatnastı. Bunday konferenciyalar oqıw procesin ilimiy qatnas jasaw tiykarında shólkemlestiriwge járdem beredi,-deydi filial oqıtıwshısı, pedagogika ilimleriniń doktorı Dármenbay Nurıshov.
Brifingte ǵalaba xabar quralları wákilleri tárepinen bayanatshılarǵa sorawlar berilip, olarǵa juwaplar aldı.

Adilbay Orazov,
Qaraqalpaqstan xabar agentligi sholıwshısı