Búgingi kún jaǵdayına Qaraózek rayonında tábiyǵıy gazden paydalanıwshı 6388 jeke xojalıq, 138 kótere tutınıwshı hám rayon orayınan alıstaǵı tábiyǵıy gaz jetip barıwı qıyın aymaqlarda 2971 suyılttırılǵan gazden paydalanıwshı xojalıqlar jaylasqan.

Tutınıwshılardı úzliksiz tábiyǵıy hám suyılttırılǵan gaz benen támiyinlew boyınsha anıq rejeler islep shıǵılıp, bul jumıslar rayonlıq gaz támiynatı bólimi tárepinen ámelge asırılmaqta.
– Tutınıwshılarǵa tábiyǵıy gaz jetkerip beriwde rayon boyınsha jámi hárekettegi 544,8 kilometrlik gaz tarmaqları bolıp, solardıń 22,6 kilometrlik bólegi joqarı basımlı, 301,7 kilometrlik bólegi orta basımlı gaz tarmaqları bolıp esaplanadı. Solardan 28,4 kilometrlik bólegi jer astında jaylasqan. Sonday-aq, tutınıwshılarǵa 143 gaz bólistiriwshi punktler arqalı tábiyǵıy gaz jetkerip beriledi,-deydi Qaraózek rayonlıq gaz támiynatı bóliminin bas injeneri Baxram Abilakimov.
Xalıqqa tábiyǵıy gaz jetkerip beriwdi ele de jaqsılaw hám gaz tarmaqlarında gaz shıǵınların azaytıw maqsetinde «Parkent tájiriybesi» tiykarında «Avtomatlastırılǵan máhálle tutınıw qadaǵalawı balansı» joybarı boyınsha jumıslar qolǵa alınǵan. Usı tájiriybeni sınaw maqsetinde Esimózek mákan puqaralar jıyını tańlap alınǵan. Tańlap alınǵan bul aymaqtaǵı 8 kóshede 255 xojalıq jaylasqan bolıp, ondaǵı gaz tarmaqlarınıń 6,9 kilometrlik bólegi jer ústinde hám 1,0 kilometrlik bólegi jer astında jaylasqan.
Bul avtomatlastırılǵan máhálle tutınıw qadaǵalawı balansı sistemasınıń iske túsiriliwiniń tiykarǵı maqseti, jıllıq gaz shıǵınlarınıń aldın alıw, sonday-aq, tutınıwshılarǵa jetkerip beriletugın tábiyǵıy gaz támiynatın jáne de jaqsılawdan ibarat.

Á.Jiyemuratov,
Qaraqalpaqstan xabar agentligi.