Ózbekstan Respublikası Prezidenti Shavkat Mirziyoev 19-fevral kúni elimizde sapar menen bolıp turǵan Saudiya Arabstanı Patshalıǵı haj hám umra isleri ministri Tavfiq bin Favzon ar-Rabianıń basshılıǵındaǵı delegaciyanı qabılladı.

Ushırasıw aldınan joqarı mártebeli miyman mámleketimiz basshısına Saudiya Arabstanı Patshası Salmon Ol Saud hám Miyrasxor, mámleket Bas ministri Muhammad Ol Saudtıń sálemin hám jaqsı tileklerin jetkerdi. Ministr, sonday-aq, Patshanıń kóp milletli Ózbekstan xalqına sawǵası –muqaddes Kayba jamılǵısı kisvanıń bir bólegin tapsırdı.

Ózbekstan jetekshisi, óz gezeginde, Saudiya Arabstanı basshısına biybaha sawǵa hám zıyaratshılarımızdıń musılman dúnyası orayları- Mákke hám Madinada bolıwı ushın jaratılǵan imkaniyatlar menen qolaylı sharayatlar ushın tereń minnetdarshılıq bildirdi. Ótken jıldıń ózinde 800 mıńnan aslam puqaralarımız Umra zıyaratın, 15 mıń puqara Haj ibadatın orınladı.

Sóylesiw waqtında ózbekstanlı zıyaratshılarǵa sharayatlar hám kórsetilip atırǵan xızmetlerdiń sapasın jáne de jaqsılaw, olardıń Saudiya Arabstanına saparı qáwipsiz hám qolaylı bolıwın támiyinlew máselelerine ayrıqsha itibar qaratıldı.

ÓzA