Ózbekstan Sawda-sanaat palatası Qaraqalpaqstan Respublikası basqarması hám Ózbekstan mámleketlik kórkem óner hám mádeniyat institutı Nókis filialı tárepinen isbilermenlikke qızıǵıwshı student qızlar ushın «Hayal, biznes hám innovaciya» atamasında ushırasıw shólkemlestirildi,-dep xabar bermekte basqarmanıń baspasóz xızmeti.

Seminarda Sawda-sanaat palatası Qaraqalpaqstan Respublikası basqarması baslıǵınıń orınbasarı N.Mambetova, filial direktorınıń Hayal-qızlar máseleleri boyınsha másláhátshisi O.Qıdırniyazova, “ALPAMIS STOMADENT” JShJ direktorı, isbilermen M.Jolshimova, “Rosimed” JShJ tárepinen shólkemlestirilgen estetikalıq-kosmetologiyalıq orayınıń baslıǵı S.Asanovalar qatnasıp, student-qızlar menen biznes hám innovaciyalıq jumıslarında toplaǵan tájiriybeleri menen ortaqlastı.
― Sawda-sanaat palatasınıń Jaslar hám hayal-qızlar isbilermenligin rawajlandırıwǵa kómeklesiw bólimi tárepinen tiyisli mákeme hám shólkemler, isbilermenler menen birgelikte orınlarda isbilermenlikke qızıǵıwshı jaslar, hayal-qızlar hám puqaralar ushın biznes seminarlar, ushırasıwlar shólkemlestirip kelmektemiz. Ásirese, bul ushırasıwlarda tájiriybeli isbilermenler óz bilim hám tájiriybeleri menen ortaqlasıp atır. Búgingi shólkemlestirilgen ilajda student qızlar Húrmetli Prezidentimiz tárepinen isbilermenlerge jaratılǵan imkaniyatlar hám jeńilliklerden tolıq xabardar bolıp, biznesin baslaw xám onı rawajlandırıw boyınsha maǵlıwmatlarǵa iye boldı. Aldaǵı waqıtlarda Sawda-sanaat palatası tárepinen elimiz puqaraların isbilermenlikke tartıw baǵdarındaǵı ilajlar ele de dawam etedi,-deydi N.Mambetova.
Ilajda student qızlar ózlerin qızıqtırǵan sorawlarǵa juwap aldı.

Qaraqalpaqstan xabar agentligi