AQSh hám Rossiya wákilleri Saudiya Arabstanında sóylesiw ótkergen bolsa, Túrkiya basshısı Rejep Tayyip Еrdoǵan Ankarada Vladimir Zelenskiy menen ushırastı.

Ukraina jetekshisi keshe keshte Birlesken Arab Ámirliklerinen Túrkiya paytaxtına ushıp keldi.
– Saudiya paytaxtındaǵı sóylesiw Ukraina ushın kútilmegen waqıya, – delingen «Anadolu» xabarında. – Bul haqqında Prezident Zelenskiy Еrdoǵan menen birge Ankarada ótkerilgen qospa baspasóz ánjumanında ayttı.
Ol Túrkiyanıń miymandoslıǵı, óz-ara sóylesiwge salmaqlı hám konstruktiv qatnasqanınan qanaatlanǵanın bildirip, bılay degen:
– Qatnasıqlarımız joqarı dárejede, bul ushın mırza Еrdoǵanǵa hám pútkil túrk xalqına minnetdarshılıq bildiremen, dedi. Siyasatshı Túrkiya ukrainalı áskeriy xızmetkerlerdi, tınısh xalıq wákillerin tutqınlıqtan azat etiwge járdem bergenin esledi. Sonday-aq, mámleket Ukrainanıń aymaqlıq pútinligi hám suvereniteti boyınsha oǵada principial poziciyada ekenin joqarı bahaladı.
Prezident jaqında Ukrainanıń Ankaradaǵı elshisi etip tayınlanǵan Nariman Jalol da 3 jıl tutqınlıqta saqlanǵanın esletti.
– Barlıq ukrainalı tutqınlar úylerine qaytsın, – dep qosımsha etti Ukraina basshısı. – Olar óziniń shańaraǵı menen tınısh-tatıw jasasın. Tutqınlardı Ukrainaǵa qaytarıwımız kerek. Ar-Riyodtaǵı Rossiya – AQSh sóylesiwi biz ushın kútilmegen qádem boldı. Bul haqqında ǵalaba xabar qurallarınan bildik.

M.Pirmatova, ÓzA