Keshe AOKAda ótkerilgen brifingte «Hududgaztayminot» AJ málimleme xızmetiniń basshısı Diloram Jumaniyozovanıń málim etiwinshe, jámiyet tárepinen 2025-jıldıń basınan xalıqqa hám kótere tutınıwshılarǵa 4 milliard 923 million 74 mıń metr kub tábiyǵıy gaz jetkerilgen.

Sonıń 3 milliard 441 million 910 mıń metr kubı xalıqqa, 1 milliard 481 million 164 mıń metr kubı kótere tutınıwshılarǵa jetkerilgen. Sonday-aq, ıssılıq támiynatı kárxanaları 297 million 180 mıń, sociallıq taraw obyektleri 63 million 47 mıń, avtomobillerge gaz toltırıw kompressor shaqapshaları bolsa 462 million 21 mıń metr kub tábiyǵıy gaz benen támiyinlengen. 90 mıń 463 tonna suyıltırılǵan gaz qarıydarlarǵa jetkerilgen.
Shetki aymaqlardagı xalıq reje-grafik tiykarında gaz ballonları menen támiyinlenbekte. Qıs máwsimi ushın 35 mıń 100 dana gaz ballonları hám 3,5 mıń tonna rezerv qáliplestirilgen.
Gaz támiynatınıń turaqlılıǵın támiyinlew maqsetinde arnawlı texnika, komplektlewshi bólekler hám avariyalıq jaǵdaylardı saplastırıwǵa 848 qánigeden ibarat brigadalar tartılǵan.
Jıl basınan berli 6021 nızamsız gazden paydalanıw jaǵdayı anıqlanıp, 81 milliard 300 million sumlıq gaz kólemi qayta esap-sanaq etildi. Sonday-aq, 30 «bunker»diń jumısı ashılıp, 17,3 mıń tonna suyıltırılǵan gaz talan-taraj etiliwine jol qoyılmadı.
Gaz támiynatı sistemasın modernizaciyalaw sheńberinde aralıqtan monitoring hám baqlaw imkaniyatın beretuǵın telemetriya sisteması engizildi. Jańalanǵan gaz bólistiriw punktlerinde jasalma intellektten paydalanıw imkaniyatı jaratıldı.
Bgingi kúnde Qaraqalpaqstan Respublikası, Xorezm, Buxara, Namangan, Jizzaq, Sırdárya wálayatlarında bul joybar ámelge asırılmaqta.

N.Ziyodullaeva,
ÓzAnıń xabarshısı