Ájiniyaz atındaǵı Nókis mámleketlik pedagogikalıq institutında jaslar arasında jınayatshılıq hám huqıqbuzarlıqlar, atap aytqanda, kiberjınayatlardıń aldın alıw hám oǵan qarsı gúresiw máselelelerine baǵıshlanǵan ushırasıw shólkemlestirildi,-dep xabar bermekte usı instituttıń baspasóz xatkeri I.Mátekov.
Ilajǵa Qaraqalpaqstan Respublikası Ishki isler ministri, polkovnik B.Tórebekov, ministrliktiń Operativ izlew xızmeti kiber jınayatshılıqqa qarsı gúresiw bóliminiń baslıǵı, mayor D.Seytmuratov, juwapker qánigeleri, instituttaǵı jaslardıń tálim-tárbiyasına juwapker qánigeler, tyutorlar hám studentler qatnastı.
Ushırasıwdı institut rektorı Q.Qodirov alıp bardı.
Ilajda atap ótilgenindey, búgingi kúnde global informaciyalıq maydanda kiber ortalıq penen baylanıslı bolǵan jańa qáwipler payda bolmaqta. Sonlıqtan, virtual álemdegi hújimlerden qorǵanıw máselesi dúnya jámiyetshiligin tereń oyǵa salmaqta.
Dúnya boylap hár jılı 500 millionnan aslam kiber hújimler shólkemlestiriledi. Ózbekstanda da sońǵı jıllarda usı túrdegi jınayatlardıń sanı kóbeyip, bank-qarjı operaciyaları arqalı basqalardıń plastik kartasındaǵı qarjılardı ózlestiriw, zıyanlı viruslar tarqatıw, qumar hám táwekelshilikke tiykarlanǵan onlayn oyınlar, diniy dogmatizmge baǵdarlanǵan informaciyalıq hújimler, onlayn sawda maydanındaǵı aldawshılıqlar sıyaqlı jaǵdaylar jiyi-jiyi ushıraspaqta.
Ashınarlı tárepi, informaciyalıq texnologiyalar járdeminde huqıqbuzarlıq hám jınayatqa qol urǵan adamlardıń arasında jaslar kópshilikti quraydı. Respublikamızda virtual álemdegi nızam buzılıwshılıqtıń basım kópshiligi 16-23 jas aralıǵındaǵı jaslar tárepinen ámelge asırılmaqta. Bunnan kórinip turǵanınday, kiberqáwipsizlikti támiyinlew máselesi búgingi kúni hár qashanǵıdan da áhmiyetli bolıp tabıladı.
Ilajda qánigeler tárepinen jaslar arasında bunday jaǵdaylardıń aldın alıw baǵdarında ámelge asırılıp atırǵan jumıslar, kiberjınayatshılıqtıń huqıqıy aqıbetleri haqqında maǵlıwmatlar berilip, aldaǵı birgelikte islenetuǵın jumıslar belgilep alındı.

Qaraqalpaqstan xabar agentligi