Ósip kiyatırǵan jas áwladtıń tábiyatqa bolǵan mehirin oyatıw hám olardıń ekologiyaǵa baylanıslı shıǵarılǵan nızamlar boyınsha bilim kónlikpesin arttırıw maqsetinde, Nókis qalasında respublikamızdaǵı ulıwma orta bilim beriw mektepleriniń joqarı klass hám kásip-óner mektepleri oqıwshıları arasında «Siz ekologiyaǵa tiyisli nızamlardı bilesiz be?» respublikalıq tańlawınıń Qaraqalpaqstan Respublikası basqıshı ótkerildi.

Tańlawǵa respublikamızdıń barlıq aymaqlarınan usı tańlawdıń sektor basqıshlarında jeńimpazlıqtı qolǵa kirgizgen komandalar belgilengen 4 shárt boyınsha óz-ara bellesti.
Qızıqlı ótken tańlaw juwmaǵında, birinshi orındı Nókis qalasındaǵı 33-sanlı ulıwma orta bilim beriw mektebiniń komandası qolǵa kirgizip, tańlawdıń Ózbekstan Respublikası basqıshına jollamanı qolǵa kirgizdi.
Tańlawda ózleriniń tereń bilimge iye ekenligin kórsete alǵan Taxtakópir rayonındaǵı 3-sanlı ulıwma orta bilim beriw mektebiniń oqıwshıları ekinshi hám Shomanay rayonındaǵı 15–sanlı ulıwma orta bilim beriw mektebiniń komandası sıylı úshinshi orınlardı iyelewge miyasar boldı.
Ótkerilgen tańlaw sońında jeńimpaz komandalar shólkemlestiriwshiler tárepinen tayarlanǵan arnawlı diplom hám estelik sawǵalar menen sıylıqlandı.

Adilbay Orazov,
Qaraqalpaqstan xabar agentligi sholıwshısı