Ózbekstan Respublikası Prezidenti Shavkat Mirziyoev 18-fevral kúni Kuveytten Tashkentke qaytqannan soń, qala qurılısı tarawındaǵı xalıqaralıq ilajlarda qatnasıw ushın elimizge kelgen Túrkiy mámleketler shólkemi Aqsaqallar keńesiniń baslıǵı, belgili siyasatshı, Túrkiya Respublikasınıń burınǵı bas ministri Binali Yildirimdı qabılladı.

Ushırasıw basında joqarı mártebeli miyman mámleketimiz basshısına Túrkiya Prezidenti Rejep Tayyip Еrdoǵannıń sálemin hám jaqsı tileklerin jetkerdi.
Kóp tárepleme birge islesiwdi muwapıqlastırw hám alǵa qoyıwda Aqsaqallar keńesiniń roli hám belsene qatnasıwı artıp atırǵanın esapqa alıp, shólkem sheńberinde hár tárepleme birge islesiwdi bunnan bılay da keńeytiw máseleleri dodalandı.
Túrkiy mámleketler shólkemi sammitleriniń juwmaǵında qabıl etilgen baǵdarlama hám baslamalardı ámelge asırıw maqsetinde ámeliy sheriklikti keńeytiw hám baylanıslardı jedellestriw áhmiyetli ekeni atap ótildi.
TMSh sheńberinde bolajaq ilajlarǵa tayarlıq kóriw hám olardı ótkeriw máseleleri kórip shıǵıldı.
Aqsaqallar keńesi Túrkiy mámleketler shólkemi janındaǵı turaqlı másláhát uyımı esaplanatuǵının atap ótiw kerek.
Túrkiy dúnya qala qurlısı kongressi 2002-jılı Ankara qalasında shólkemlestirilgen Injener hám arxitektorlar awqamı tárepinen ótkeriledi. Awqamnıń jumısına Samarqand hám Nawayı qalalarınıń hákimlikleri belsene qatnaspaqta.

ÓzA