Joqarı bilimlendiriw mákemeleriniń pitkeriwshilerin jumıs penen támiyinlewge járdemlesiw maqsetinde Prezidenttiń 2025-jıl 14-fevraldaǵı qararına muwapıq, «Keleshekke qádem» baǵdarlaması ámelge asırılatuǵını belgilendi. Bul baǵdarlama pitkeriwshilerdiń miynet bazarına beyimlesiwsheńligin arttırıw, olardı jumıs penen támiyinlew hám óziniń biznes joybarların jolǵa qoyıwı ushın zárúr sharayat jaratıwǵa qaratılǵan.
Baǵdarlama sheńberinde isbilermenlik jumısın baslaw tileginde bolǵan joqarı bilimlendiriw mákemeleriniń pitkeriwshileri ushın arnawlı baǵdarlar islep shıǵıladı. Olarǵa biznes ideyaların tayar joybar dárejesine jetkeriwde tolıq járdem beriledi. Onda, pitkeriwshiler ushın qolaylı qarjılandırıw mexanizmleri engizilip, olardıń isbilermen sıpatında qáliplesiwi ushın barlıq zárúr sharayatlar jaratıladı.
Sonday-aq, joqarı bilimlendiriw mákemeleriniń pitkeriwshi hám tómengi basqısh studentlerine tarawǵa sáykes túrde ashıq tańlawlar shólkemlestiriledi. Bul tańlaw jeńimpazları múnásip jumıs orınları menen támiyinleniwi názerde tutılǵan. Bul arqalı pitkeriwshilerdiń ámeliy tájiriybesin arttırıw hám miynet bazarındaǵı talaplarǵa sáykes túrde qánigelik tańlawı qollap-quwatlanadı.
Baǵdarlamaǵa muwapıq, potenciallı jumıs beriwshi shólkemlerdiń joqarı maǵlıwmatlı qánigelerge bolǵan talapları tallanıp, qánigelik boyınsha talaplar qáliplestiriledi. Jumıs beriwshilerdiń buyırtpalarına bola tańlaw jeńimpazları ushın arnawlı kásiplik oqıw baǵdarlamaları islep shıǵıladı. Bul baǵdarlamalar qarjılandırılıp, pitkeriwshilerge óndiris obyektlerinde ámeliyat ótew hám sırt eldegi joqarı bilimlendiriw mákemelerinde qısqa múddetli oqıw kurslarında qatnasıw imkaniyatı jaratıladı.
«Keleshekke qádem» baǵdarlaması qánigelerdiń jumıs tabıw procesin jeńilletiw, kásiplik rawajlanıwın qollap-quwatlaw hám olardıń miynet bazarında básekige shıdamlılıǵın arttırıwǵa qaratılǵan bolıp, keleshekte ekonomikanıń hár qıylı tarmaqlarında maman kadrlar jetistiriwge xızmet etedi.

Qaraqalpaqstan xabar agentligi