Jaqın jıllarǵa shekem mútáj nawqaslardıń wálayat yamasa respublikalıq medicina mákemelerinde emleniwi ushın qaǵaz túrindegi «order» sistemasınan paydalanıp kelingen. DSM baspasóz xızmetiniń atap ótiwinshe de bunday jeńilliklerdi beriwde kóbinese koorupciyalıq jaǵdaylarǵa jol qoyılǵan. Aqıbetinde puqaralar túrli qıyınshılıqlarǵa dus kelgen. Bul bolsa haqıyqıy mútájligi bar xalıqtıń emleniw ushın jıllap gezekte turıwına yamasa «order» alalmay, hálek bolıwına sebep bolǵan.
Mámleketimiz basshısınıń 2021-jıl 28-iyuldegi tiyisli qararına muwapıq bunday ámeliyattan pútkilley waz keshildi. Nátiyjede Mámleketlik byudjet qarjıları esabınan jeńillikli kategoriyaǵa kiretuǵın shaxslarǵa kvota tiykarında «order» beriw tártibi biykar etilip, olardı elektron sistema arqalı esapqa alıw hám gezek tiykarında emleniwge jollaw sisteması engizildi.
– Bul arqalı tarawda ashıq-aydın mexanizmler ámeliyatqa engizildi, – deydi Medicinalıq járdemdi shólkemlestiriw departamentiniń bólim baslıǵı Azizbek Hamroqulov. – Nátiyjede xalıqqa Birden-bir interaktiv mámleketlik xızmetler portalı arqalı óziniń múrájatı hám gezegi haqqındaǵı málimlemeni alıw imkaniyatı jaratıldı.
Bul jollama elektron málimleme sistemasında avtomat túrde qáliplestirilip, nawqas mámleketlik yamasa mámleketlik emes medicina shólkeminde medicinalıq xızmetlerden paydalanıwdı ıqtıyarlı túrde tańlaydı.
Prezidentimizdiń 2003-jıl 26-fevraldaǵı tiyisli pármanında joqarı texnologiyalıq qánigelestirilgen medicinalıq járdem kórsetiwshi medicina shólkemleri tárepinen Mámleketlik byudjet qarjıları esabınan medicinalıq járdem kórsetiletuǵın 20 jeńillikli kategoriyadaǵı shaxslardıń dizimi keltirilgen.
Sonıń ishinde, jetim balalar, I hám II topar mayıplıǵı bolǵan, jasqa baylanıslı pensiyaǵa shıqqan hám islemeytuǵın hám 1941-1945-jıllardaǵı urıs aqıbetinde mayıplıǵı bolǵan shaxslar hám onıń qatnasıwshıları, sonday-aq, olarǵa teńlestirilgen shaxslar, xalıqaralıq jawıngerler, «Sociallıq qorǵawdıń birden bir reestri» málimleme sisteması arqalı kem támiyinlengen shańaraqlardıń balalar napaqası hám materiallıq járdem alıwshı aǵzaları, Kámbaǵal shańaraqlar reestrine kirgizilgen shańaraqlardıń aǵzaları hám aylıq dáramatı shańaraq aǵzalarınıń hár birine minimal tutınıw qárejetleri muǵdarınıń 2 esesinen kóp bolmaǵan shańaraqlardıń aǵzaları jeńillikli emleniw huqıqına iye.
Nawqas emlengeninen soń Mámleketlik medicinalıq qamsızlandırıw qorı bul mákemege bazalıq bahalar sheńberinde kórsetilgen medicinalıq xızmetlerdi tiykarlap beriwshi hújjetlerge muwapıq jumsalǵan qarjılardı Mámleketlik byudjet esabınan ótkerip beredi.
Usı jeńillik tiykarında emlewxanada emlenip atırǵan shaxslarǵa óz esabınan dári-darmaqlar hám medicinalıq buyımlardıń alınıwı ulıwma múmkin emes.
Emlewxanada nawqaslar tárepinen alıp kelingen dári-dármaqlar hám medicinalıq buyımlardı isletiwge ruqsat beriw tártibi Densawlıqtı saqlaw ministrligi tárepinen tastıyıqlanǵan.
Bul baǵdardaǵı huqıqıy tiykar Prezidentimizdiń 2022-jıl 26-oktyabrdegi qararında belgilep qoyılǵan. Oǵan bola, nawqaslardı emlew ushın talap etiletuǵın dári-dármaqlar hám medicinalıq buyımlar tolıq emlewxana tárepinen satıp alınadı.

ÓzA