Jınayat isleri boyınsha Nókis rayonı sudınıń tergew sudyası G.Utepbergenova tárepinen rayondaǵı Samanbay hám Baqanshaqlı awıl puqaralar jıyınlarında aymaq turǵınları menen ashıq sáwbetlesiw ótkerildi.
Onda máhálle aymaǵında huqıqbuzarlıq hám jınayatshılıqtıń aldın alıw, jınayattan awlaq qáwipsiz aymaqtı jaratıw boyınsha profilaktikalıq túsinik jumısları alıp barıldı. “2025-jılı respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw boyınsha ilajlar haqqında”ǵı Prezident qararı tiykarında isleniwi tiyis wazıypalar boyınsha da maǵlıwmatlar berildi.
Sonday-aq, jınayatshılıq hám huqıqbuzarlıqlardıń kórsetkishi artıp “Qızıl aymaq”qa kirgizilgen máhállelerde jıyın belsendileri menen birge islesiwdiń áhmiyeti atap ótilip, huqıqıy másláhátler hám puqaralardıń huqıqları haqqında sóz etildi.
Xalıq penen turaqlı sáwbetlesiw arqalı olardıń eń tiykarǵı mashqalaları, jumıssızlıq, sana-sezim hám ideologiya menen baylanıslı mashqalalar, jınayat ushın jol ashıwı múmkin bolǵan faktorlardı anıqlawǵa boladı. Sonıń menen birge, adamlardıń mashqalaların tikkeley tıńlap, olarǵa beriliwi múmkin bolǵan huqıqıy járdem hám resurslardı da usınıw júdá áhmiyetli.
Jınayatshılıq hám huqıqbuzarlıqlardıń aldın alıwda xalıq penen ushırasıw arqalı olardıń mashqalaların úyreniw júdá áhmiyetli rol atqaradı. Sebebi, máhálle belsendileri menen shólkemlestirilgen bunday ushırasıwlar jınayatshılıqtıń azayıwına járdem beriwi menen birge, puqaralardıń huqıqıy bilimlerin bekkemlew, ózleriniń huqıqları menen minnetlemelerin túsinip, juwapkershiligin arttırıwǵa járdem beredi.
Solay eken, sudyalar tárepinen orınlarda ótkerilip atırǵan bunday ushırasıwlar jınayatshılıqtı azaytıw arqalı jámiyette huqıqıy mádeniyattı ele de jetilistiriwde eń tiykarǵı qádem bolıp tabıladı.

Qaraqalpaqstan xabar agentligi