Nókis qalasındaǵı 27-kishi rayon aymaǵında jaylasqan kóp qabatlı imaratlardıń birinde «KARIMOV» klinikasınıń ashılıw máresimi bolıp ótti. Oǵan Qaraqalpaqstan Respublikası Densawlıqtı saqlaw ministri M.Qurbanov, densawlıqtı saqlaw tarawınıń juwapker qánigeleri, keń jámiyetshilik wákilleri, aymaq turǵınları qatnastı.
Onda atap ótilgenindey, búgingi kúnde adamlar farmacevtika biznesiniń qurbanı hám nıshanı bolmawı ushın medicinanıń neyrokineziologiya baǵdarı turmısımızǵa kirip kelmekte hám bul boyınsha qánigeler jetilisip shıqpaqta. Xalıq medicinasına jaqın bul tarawdan nawqaslanǵanlar kóbirek maǵlıwmatqa iye bolsa dártlerine dawa tawıp, dárisiz emleniw imkaniyatına iye boladı.
Kineziologiya – bul latın tilindegi sóz bolıp, bizińshe «háreket» degen mánisti beredi. Jaqın jıllardan berli Ózbekstan Respublikasına da bul taraw kirip kelmekte.
Adamlardıń reabilitaciya jaǵdayın, denesindegi háreketlerdi, yamasa neyrodinamikasın óz jaǵdayına qaytarıw ushın tez tásir kúshin kórsetetuǵın, yaǵnıy, adam kóp waqıtlar dawamında emlenbesten, tez arada háreketleniwin qayta tiklep beriwin úyretiwshi ilim bolıp esaplanadı.
– Bul usıl birinshi márte l963-l964-jılları Amerikada rawajlana baslaǵan. Soń Evropa mámleketlerinde, Rossiyada rawajlanǵan. Portugaliyanıń Portu qalasındaǵı medicina universitetinde hám Germaniyanıń Gannover qalasındaǵı neyrokineziologiya universitetinde de bul taraw boyınsha jumıslarımızdı rawajlandırıp atırmız. Jıllar dawamında sozılmalı bolıp kelgen nawqaslardı tez waqıt ishinde emlew bizlerdiń tiykarǵı wazıypamız. Klinikamızda tájiriybeli qánigeler tárepinen zamanagóy medicinalıq úskenelerde hár tárepleme sapalı medicinalıq xızmetler kórsetiledi. Házirshe filialda ózlerimiz tayarlaǵan shákirtler jumıs alıp baradı. Biraq, keyin ala bul jerde de jergilikli qánigelerdi tayarlap shıǵarıp, jumıs orınların jaratıw maqsetimiz bar,-deydi «KARIMOV» klinikasınıń tiykarın salıwshısı neyrokineziolog shıpaker S.Karimov.
Ilajda qatnasıwshılar klinikadaǵı sharayatlar menen tanısıp, ózlerin qızıqtırǵan maǵlıwmatlarǵa iye boldı.

Qaraqalpaqstan xabar agentligi