Indoneziyanıń jańa paytaxtı – Nusantara atqarıwshi direktorı Basuki Hodimuljano sırt el elshixanaları ushın biypul jer ajıratıw usınısın alǵa qoymaqta, dep xabar tarqattı «Jakarta Globe» portalı.
Bul baslamadan gózlengen maqset sırt ellilerdiń itibarın tartıw, mámleketlerdi Nusantarada wákilxana ashıwǵa shaqırıw, degen hámeldar. Sonıń menen birge Hodimuljano juwmaqtı Prezident Prabovo Subianto shıǵaratuǵının da atap ótken:
– Men qarar qabıllamayman. Elshixanalardı tezirek ashıw jolı sıpatında Prezidentke tek ǵana usınıs kirgizbekshimen.
Húkimet diplomatiyalıq kompleks ushın álle qashan 62,9 gektar jer ajıratqan.
Basılımnıń jazıwınsha, eger bul joybar maqullanıp, tegin jer berilse, sırt el elshixanaların kóshiriw jedellesedi. Bul arqalı Indoneziyanıń xalıqaralıq baylanısları da bekkemlenedi.
Bul qádem húkimettiń jańa paytaxttı 2028-jılǵa shekem iske túsiriw rejesine sáykes keledi. Bunday siyasat Nusantaranıń diplomatiyalıq oray sıpatındaǵı tartımlılıǵın arttırıw, global baylanıslar bekkemleniwine járdem beriwi múmkin.
Qaraqalpaqstan xabar agentligi