Oliy Majlis Nızamshılıq palatasındaǵı Ózbekstan Xalıq demokratiyalıq partiyası frakciyasınıń gezektegi májilisinde xalıqqa sociallıq xızmetler kórsetiw sistemasın jáne de jetilistiriwge qaratılǵan nızam joybarı ekinshi oqıwda kórip shıǵıldı.

Atap ótilgenindey, usı nızam joybarı menen xalıqqa pensiya tayınlaw sistemasına zamanagóy málimleme texnologiyaların jaqsı qollanǵan halda mámleket tárepinen kórsetilip atırǵan xızmetler sapasın jáne de arttırıw maqset etilgen. Sonnan kelip shıǵıp, “Puqaralardıń mámleketlik pensiya támiynatı haqqında”ǵı nızamǵa pensiya alıw jasına tolǵan (erler 60 jas, hayallar 55 jas) puqaralarǵa jasqa baylanıslı pensiyanı olardıń óz aldına múrájatın talap etpegen halda proaktiv túrde tayınlaw tártibin belgilewge baylanıslı ózgeris hám qosımshalar kirgizilmekte.
Sonday-aq, sociallıq qorǵawǵa mútáj xalıq qatlamlarına barlıq napaqalardı tayınlaw hám tólew Sociallıq qorǵaw milliy agentligi wákilligine ótkerilgeni múnásibeti menen “Mámleketlik bajı haqqında”ǵı hám “Xalıqtıń bántligi haqqında”ǵı nızamlarǵa da ózgeris hám qosımshalar kirgiziw usınıs etilmekte.
Frakciya aǵzaları nızam joybarı menen bir qatar jeńillikler berilip atırǵanın, artıqsha áweregershiliklerdiń aldı alınatuǵının atap ótip, onı qollap-quwatladı.

ÓzA