Anası Zarinanı tórt jasında kórkem gimnastikaǵa ertip alıp baradı. Lekin, awır minez, oyshań júretuǵın kishkene qızdıń bul sportqa degen onshelli qızıǵıwshılıǵı bolmadı. Úyinde ákesi menen shaxmat oynap otıratuǵın qızdıń usı sport túrine qızıǵıwshılıǵı basım ekenligin sezgen anası onı ózleri jasaytuǵın Taqıyatas rayonındaǵı shaxmat klubına alıp baradı. Sol waqıtta shaxmat klubta shaxmat boyınsha Aziya chempionı Maxım Orazmuxammedova oǵan trenerlik etip, shaxmat sportınıń sırların úyrete baslaydı.
2017-jılı Nókis qalasında tuwılǵan Larina Zarina 2021-jıldan baslap shaxmat sportına degen dáslepki qádemin taslap, qısqa waqıttıń ózinde yaǵnıy, 6 yarım jasında 9 jastaǵı ul hám qız balalar arasında ótkerilgen Qaraqalpaqstan chempionatında birinshi orındı iyeleydi.
Zarina taqıyataslı Konstantin menen Nasibanıń tuńǵısh qızı. Ol baqsha tárbiyalanıwshısı bolsa da óz teńlesleri arasında shaxmat boyınsha ótkerilgen jarıslarda jaqsı kórsetkishlerge erise basladı. Atap aytqanda, 2022-jılı Qaraqalpaqstan Respublikası mektepke shekemgi bilimlendiriw mákemeleri tárbiyalanıwshıları arasında ótkerilgen jarısta birinshi orındı iyelegen bolsa, 2024-jılı Qaraqalpaqstan Respublikası chempionatında segiz jastaǵı ul hám qız balalar arasında ekinshi hám Ózbekstan chempionatında úshinshi orınlardı qolǵa kirgizedi. 2024-jılı Mektepke shekemgi bilimlendiriw mákemeleri tárbiyalanıwshıları arasında ótkerilgen jarıstıń Qaraqalpaqstan hám Ózbekstan Respublikaları basqıshlarında birinshi orınlardı iyeleydi. Sonday-aq, 2024-jıldıń 11-13-noyabr kúnleri paytaxtımız Nókis qalasında ótkerilgen Qaraqalpaqstan Respublikası chempionatında Zarina birinshi orındı iyelegen bolsa, usı jıldıń 28-yanvar hám 3-fevral kúnleri Jizzaq wálayatında bolıp ótken Ózbekstan chempionatında Standart hám Blits baǵdarları boyınsha birinshi orındı iyelep, Rapid baǵdarı boyınsha úshinshi orın jeńimpazı bolıp, jáhán chempionatına jollamanı qolǵa kirgizedi.
Larina Zarina házirgi waqıtta Taqıyatas rayonındaǵı 2-sanlı ulıwma bilim beriw mektebiniń 1-klasında bilim almaqta.
-Bes jasında jazıp, sızıp hám oqıwdı úyrendi. Shaxmat tek ǵana aqıl gimnastikası ǵana emes al, kúshli fizikalıq kúsh talap etetuǵın sport túri. Sebebi, jarıslarda kúnine 2 partiyadan oynaytuǵın bolsa hár qaysısı 2, 3 saattan dawam etedi. Aqıl menen oynaytuǵın bul sport túrinde tikke otırıp oyındı dawam etiwi ushın sportshı hár tárepleme salamat bolıwı kerek. Sonlıqtan da biz qızımız Zarinanıń densawlıǵına, onıń awqatlanıw rejimine jeterlishe itibar qaratıp atırmız. Ol basqa sabaqlarǵa qaraǵanda matematikanı jaqsı kóredi. Sabaqlarınan qatarları arasında ilgerilep ketkenlikten «nege ápiwayı nárselerdi bilmeydi», degen sorawlardı beredi bazıda. Ol shaxmat boyınsha tayarlıqlar, mekteptegi oqıwınan sharshaǵan waqıtları úkesi Darina menen oynaydı. Shet tilin úyreniw onıń aldaǵı rejeleriniń biri. Sebebi, sırt elden kelgen qarsılas sportshı teńlesleri menen sóylesiwde qıyınshılıqlar bolǵan. Onıń kelesheginen úmitlerimiz kóp. Qudaqálese úlken nátiyjelerge jetisedi degen tilektemiz,-deydi anası Nasiba Qabulova.
Tórt jasınanan baslap shaxmat maydanında jaqsı nátiyjelerdi qolǵa kirgizip kiyatırǵan Zarinanıń tabısların dawam eter bolsaq ol, 2024-jıldıń 1-8-avgust kúnleri Tashkent qalasında mektep oqıwshıları arasında ótkerilgen jáhán chempionatında qatnasıp kúshli onlıqqa kiredi hám Rapid reytingi boyınsha «1523» kórsetkishine iye boladı. Al, 2024-jıldıń 1-11-dekabr kúnleri Taylandtıń Bangkok qalasında 7,9,11,13,15,17 jastaǵı mektep oqıwshıları arasında ótkerilgen Aziya chempionatında tiykarǵı oyınshı sıpatında qatnasıp blits baǵdarında “1435» reyting kórsetkishine iye boladı. Házirgi waqıtta oǵan tájiriybeli trener Abdirkerim Turaev shaxmattıń ózine jarasa sırların úyretip kelmekte.-Zarina minez qulqı tınıq, hár bir jarısta oylanıp otırıp shaxmat tasın aldıǵa súretuǵın sportshı qız. Onıń sonday bir qábileti bar, oyınlar shiyelenisip, sheshiwshi minutlar shamalasqan waqıtta qabaqların úyip, hesh nársege alańlamay, ornınan turıp ketip, aqıl-oyın tek jeńis ushın sarıplaydı. Zarinanı eń dáslep tórt jasında qızım Maxım tayarlap baslaǵan bolsa, házirgi waqıtta ol meniń kishkene shákirtim. Onıń kelesheginen úmitim kóp. Qudaqálese jáhán chempionatında jaqsı nátiyjelerdi qolǵa kirgizedi degen niyettemiz,-deydi Abdikerim Turaev.
Taqıyatas sport tarawında ázelden awır atletika menen shaxmat sport túri boyınsha belgili sportshılardı jetistirip kiyatırǵan elat esaplanadı. Usınday mektepten jáne bir sportshı qız jetisip shıǵıp, sport dúnyasında juldızday jarqırap turǵan Zarinanı aldında «kúshliler» menen bellesetuǵın jarıslar, bellesiwler, chempionatlar kútip turıptı. Sol chempionatlarda qatnasıw ushın tayarlıqlardı alıp barıp atırǵan kishkene chempionımızdıń tabısların xosh xabarlar menen jazıw jaqın arada nesip etkey degen jaqsı niyetler menen biz maqalamızǵa noqat qoyamız.

Gúlnara Turdıshova, Qaraqalpaqstan xabar agentligi