Sońǵı jılları elimizde Prezidentimizdiń basshılıǵında mámleketlik uyımlardıń ashıq-aydınlıǵın támiyinlew, ǵalaba xabar quralları menen birge islesiwdi jolǵa qoyıw baǵdarında bir qatar unamlı isler ámelge asırılıwı nátiyjesinde xalqımızdıń informaciyaǵa bolǵan talabı qanaatlandırılıp, elimizde júz berip atırǵan iri ózgeris hám jańalanıwlar jurnalistlerimiz tárepinen tolıq sáwlelendirilip barılmaqta.
Ózbekstan Jurnalistler awqamı Qaraqalpaqstan bóliminiń baslaması, Qaraqalpaqstan Respublikası Joqarǵı Keńesi hám Ministrler Keńesiniń qollap-quwatlawı menen respublikamız aymaǵında júz berip atırǵan jańalanıwlardı keń jámiyetshilikke jetkerip barıw maqsetinde, media-tur ótkeriw rejelestirilip, usı tiykarda Shımbay rayonında respublikamız ǵalaba xabar quralları wákilleri ushın press- tur shólkemlestirildi.
Press-tur qatnasıwshıları dáslep Tazǵara awıl puqaralar jıyınında bolıp, elattıń búgingi turmısı menen jaqınnan tanıstı. Atap aytqanda, ótken jılı jańadan boy tiklegen awıl puqaralar jıyını imaratında máhálle jetiligi hám aymaq belsendileri ushın jaratılǵan sharayatlar, imaratqa jaqın ornalasqan xalıqqa turmıslıq xızmet kórsetiw orınları, 52-sanlı shańaraqlıq poliklinikasında alıp barılıp atırǵan jumıslar menen tanıstı.
-Aymaǵımızdaǵı 1060 xojalıqta bes yarım mıńnan aslam xalıq tınısh-tatıw turmıs keshirmekte,-deydi jıyın baslıǵı Sadıq Ibrayımov.-Ózbekstan Respublikası Prezidentiniń arnawlı párman hám qararları, Qaraqalpaqstan Respublikası Joqarǵı Keńesi hám Ministrler Keńesi, rayon hákimliginiń hár tárepleme qollap-quwatlawı menen sońǵı bir neshe jıldıń ishinde, aymaǵımızda kóplegen iri ózgeris hám jańalanıwlar júz bermekte. Ásirese, awıl puqaralar jıyını imaratınıń zamanagóy usılda jańadan salıp beriliwi, xalıqqa turmıslıq xızmet kórsetiw orınlarınıń qurılıwı, 52-sanlı shańaraqlıq poliklinikası imaratına kapital ońlaw jumıslarınıń júrgiziliwi, 6 km aralıqtaǵı ishki jollarǵa qum-shaǵıl tas aralaspasınıń tóseliwi usınday ǵamqorlıqtıń ayqın kórinisi desek boladı. Aymaq xalqı tiykarınan diyqanshılıq penen shuǵıllanıp, turmıs keshirmekte.
-43 sotıx jerde diyqanshılıq isleymiz,-deydi usı aymaq turǵını Axmet Smetov.-Negizgi kásibim fizika páni muǵallimi bolǵanı menen, ata kárimiz diyqanshılıq penen de shuǵıllanamız. Ótken jılı 42 sotıx qıytaq jerimizden 100 million sumnan aslam dáramat taptıq. Nókis qalasında ótkerilgen zúráát bayramında Qaraqalpaqstan Respublikası Joqarǵı Keńesi Baslıǵı tárepinen multikultivator menen sıylıqlandım. Aldaǵı waqıtları diyqanshılıq ushın jer astı suwlarınan paydalanıwdı maqset etip qoyıppız.
Bunnan soń press-tur qatnasıwshıları Ózbekstan Respublikası Prezidentiniń 2025-jılda “Respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw boyınsha ilajlar haqqında”ǵı qararınıń orınlanıwı boyınsha Shımbay Jipek-jolı mákan puqaralar jıyınında alıp barılıp atırǵan jumıslardıń barısı menen tanıstı.
-Jıyın aymaǵında qáwipsizlikti támiyinlew hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw maqsetinde, kóp qabatlı turaq jaylarǵa zamanagóy baqlaw kameraları ornatıldı,-deydi “Shımbay úy-jay ońlaw” juwapkershiligi sheklengen jámiyeti baslıǵı Dáryabay Baxiev.-Sonday-aq, ótken jılı Prezidentimizdiń arnawlı qararı tiykarında, tozıwı jetken úyge renovaciyalıq jumıslar júrgizilip, 30 xojalıq jańa kvartiralarǵa iye boldı. Bunıń ushın húrmetli Prezidentimizge, respublika hám rayon basshılarına tereń minnetdarshılıq bildiremiz.
Sońınan ilaj qatnasıwshıları Shaxtemir hám Qarakól mákan puqaralar jıyınında isbilermenlik tarawı hám milliy ónermentshilikti rawajlandırıw, olardı qollap-quwatlaw boyınsha ámelge asırılǵan jumıslardıń barısı menen tanısıp, isbilermenler menen sáwbetlesti.

-Kúnine 600 kg tarını qayta islep, Qazaqstanǵa eksport etip atırmız,-deydi jeke isbilermen Salamat Jumaniyazov.-Tarı tiykarınan Buxara wálayatınan alıp kelinip, onıń kepegin malǵa ot-jem sıpatında paydalanıp kiyatırmız. Ótken jılı “Xalıq bank”tiń rayonlıq filialınan 15 mln sum jeńilletilgen kredit alıp, oǵan 4 bas qaramal alǵan edik. Házir usı mallardı baǵıp, olardıń sanın kóbeytiwge háreket etpektemiz.
Sonday-aq, press-tur dawamında ilaj qatnasıwshıları bilimlendiriw tarawında júrgizilip atırǵan reformalardıń barısı menen tanısıw maqsetinde, 41-sanlı ulıwma orta bilim beriw mektebinde boldı.
-Ózbekstan Respublikası Prezidentiniń 2023-jıl 25-dekabrdegi “2024-2026-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında”ǵı qararı tiykarında, mektebimizge 3 mlrd 868 mln. sumlıq qarjı ajıratılıp, 180 oqıwshıǵa mólsherlengen jańa imarat qurıp berildi. Bunıń nátiyjesinde mektebimiz oqıwshılarınıń sapalı bilim alıwı ushın barlıq qolaylı sharayatlar jaratıp berildi. Házirgi waqıtları oqıw dárgayında 320 oqıwshı zaman talabına say bilim alıp kelmekte. Usınday múmkinshiliklerdi jaratıp bergeni ushın Prezidentimizge úlken raxmet aytamız,-deydi 41-sanlı ulıwma orta bilim beriw mektebiniń direktorı Abdimalik Qarajanov.
Ilaj sońında rayonı hákimliginde aymaqtaǵı mákeme, kárxana hám shólkem basshılarınıń qatnasıwında Shımbay rayonın jedel sociallıq-ekonomikalıq jaqtan rawajlandırıw boyınsha 2024-jılı islengen jumıslar hám 2025-jılǵa belgilengen wazıypalarǵa baǵıshlanǵan baspasóz konferenciyası bolıp ótti. Onda jurnalistler keń jámiyetshilikti qızıqtırǵan sorawlarǵa tiyisli juwaplar aldı.

Adilbay Orazov,
Qaraqalpaqstan xabar agentligi sholıwshısı