Ózbekstan Respublikası Prezidenti Shavkat Mirziyoev Kuveyt Mámleketi Amiri Shayx Mishyal as-Sabohtiń mirát etiwine bola 17-fevral kúni rásmiy sapar menen usı mámleketke keldi.
Al-Kuveyt xalıqaralıq aeroportında mámleketimiz basshısın Amir Shayx Mishyal as Saboh, Miyrasxor Shayx Saboh Xolid al-Hamad as – Saboh hám basqa rásmiy shaxslar kútip aldı.
Ózbekstan jetekshisiniń keliwine húrmetli qarawıl sap tarttı, mámleket bayraqları kóterildi, eki mámlekettiń gimnleri atqarıldı.
Prezidentimiz húrmetli qarawıl sap aldınan ótti. Soń mámleket basshıları rásmiy delegaciyalar aǵzaları hám diplomatiyalıq korpus wákillerin qutlıqladı.
Aeroporttıń Amir terminalında jetekshiler arasında qısqa sáwbet bolıp ótti.
Búgin Ózbekstan Prezidenti hám Kuveyt Amiri joqarı dárejede sóylesiwler ótkeredi. Sammit kún tártibinen Ózbekstan menen Kuveyt arasındaǵı doslıq hám kóp táreplemeli birge islesiw baylanısların jáne de bekkemlew, siyasiy, sawda-ekonomikalıq, investiciya-qarjı hám mádeniy-gumanitarlıq tarawlarındaǵı birge islesiwdi keńeytiw máseleleri orın alǵan.
Ilajlar juwmaǵında bir qatar húkimetleraralıq hám uyımlararalıq kelisimler qabıl etiliwi názerde tutılǵan.

ÓzA