Ózbekstan Respublikası Prezidentiniń tapsırması menen shólkemlestirilgen Sırtqı biyǵárez járdem qarjıların (grantlardı) tartıw hám donorlar menen islesiw bólimi tárepinen Kegeyli rayonında áhmiyetli seminar shólkemlestirildi.

Seminarǵa Qaraqalpaqstan Respublikası Joqarǵı Keńesiniń komitet baslıqları Sh.Otemisov hám B.Seytnazarov, rayon hákimi A.Kamalov hám aymaqtaǵı máhálle jetiligi, mákeme, shólkem hám kárxana basshıları qatnastı.
Seminarda grant, texnikalıq járdem hám basqa da sırtqı biyǵárez járdem qarjıların jedel tartıw hám olardan nátiyjeli paydalanıw, sırt eller, xalıqaralıq shólkemler hám fondlar menen baylanıslardı rawajlandırıw boyınsha tolıq maǵlıwmatlar berilip, ámelge asırılıwı tiyis wazıypalar dodalandı.
Ótkerilgen áhmiyetli ilajda sırt el grant qarjıların tartıw ushın tiyisli hújjetlerdi talap dárejesinde tayarlaw, donor shólkemlerdi belgilep alıw hám maqsetli jańa joybarlar ústinde jumıs alıp barıw sıyaqlı áhmiyetli máseleler sóz etilip, qánigeler tárepinen tiyisli usınıslar berildi
Usı atamadaǵı seminar Shımbay rayonında da bolıp ótti.

Qaraqalpaqstan xabar agentligi