Qıtaydıń Xarbin qalasında ótkerilgen qısqı Aziya oyınları óziniń juwmaǵına jetti.
Aziya kontinetiniń 34 mámleketinen 1275 sportshı qatnasqan bul jarısta mámleketimizdiń sport delegaciyası da qatnastı.
Ózbekstan sport delegaciyası bul jarısta bir altın medaldı qolǵa kirgizip, ulıwma komandalıq esapta fillipinli sportshılar menen birgelikte besinshi orındı iyelewge miyasar boldı.
Jarısta Qıtay saylandı komandası 32 altın, 27 gúmis hám 26 qola medal menen sıylı birinshi orındı iyelewge miyasar boldı.
Al, ekinshi orındı 16 altın, 15 gúmis hám 14 qola medaldı jeńip alǵan Qubla Koreya Respublikası delegaciyası, úshinshi orını 10 altın, 12 gúmis hám 15 qola medalı menen yaponiyalı sportshılar iyelewge eristi.
Qońsılas Qazaqstan Respublikası delegaciyası bolsa, 4 altın, 9 gúmis hám 7 qola medaldı iyelep, jarıstı tórtinshi orında juwmaqladı.

Adilbay Orazov,
Qaraqalpaqstan xabar agentligi sholıwshısı