ÓzLiDeP Qaraqalpaqstan Respublikası Keńesiniń májilisler zalında partiyanıń Jaslar mashqalaların úyreniw hám isbilermenlikti qollap-quwatlaw bólimi tárepinen “Jas isbilermenler” ligasınıń joybarı sheńberinde “Jasıl ekonomika: turaqlı rawajlanıwǵa qaray” atamasında ushırasıw bolıp ótti.

Onda “Ratmina Hotel” miymanxanası, “Qaraqalpaq etno awıl” turistlik orayı tiykarın salıwshısı”Moynaq tur” JShJ baslıǵı, turizm tarawında 15 jıllıq tájiriybege iye isbilermen, “Dwstlik” ordeniniń iyesi Amina Bekchanova, partiya belsendileri, Qaraqalpaqstan awıl xojalıǵı hám agrotexnologiyalar institutınıń oqıtıwshıları B.Adilchaev, J.Baltashev hám student-jaslar qatnastı.
2030-jılǵa shekem Ózbekstan Respublikasında “jasıl” ekonomikaǵa ótiw hám “jasıl” ósiwdi támiyinlew baǵdarlaması, “Jasıl rawajlanıw”dıń drayveri bola alatuǵın energetika, ilim hám innovaciyalar, turizm sıyaqlı tarawlar, alternativ energiya dárekleri menen islesiw, quyash yamasa basqa da túrdegi qayta tiklenetuǵın energiya dáreklerinen nátiyjeli paydalanıw máseleleri dodalandı.
Sonday-aq, isbilermen Amina Bekchanova sońǵı jılları jaslar biznesin qollap-quwatlaw sheńberinde ámelge asırılǵan ilajlarǵa da ayrıqsha toqtap ótti.
-Biznesti qollap-quwatlaw degende bántlikti, kárxanalardı qollap-quwatlawdı túsiniwimiz kerek. Sonday-aq, biznes degende, tek ǵana pul tabıwǵa qaratılǵan tarawdı emes, al turaqlı túrde itibarǵa, qollap-quwatlawǵa mútáj bolǵan tarawdı túsiniwimiz kerek, – deydi isbilermen.
Haqıyqatında da, mámleket tárepinen biznes qanshelli qollap-quwatlansa, biznes te mámlekettiń alǵa ilgerilewine, rawajlanıwına, xızmetler sapasınıń artıwına, mámleket imidjiniń kóteriliwine hám xalıqtıń abadanlıǵına xızmet etedi. Biznes qanshelli rawajlansa, oǵan sonsha kóp jumısshılar kerek boladı, bul bolsa xalıqtı, ásirese, jaslardıń bántligin támiyinleydi.
Qızǵın sáwbetlesiw dawamında ekonomikaǵa sırt el investiciyaların tartıw, isbilermenlik hám jeke menshik múlk ushın keń imkaniyatlar jaratıwdı jáne de kúsheytiw, ilim, innovaciya, IT sıyaqlı tarawlardı, “jasıl” hám sanlı texnologiyalardı rawajlandırıw máselelerine baylanıslı pikir-usınıslar bildirildi.
Sáwbet qızǵın pikir-talaslar hám soraw-juwaplar menen juwmaqlandı.

Qaraqalpaqstan xabar agentligi