Qaraqalpaqstan medicina institutı klinikasınıń shıpakerleri hám klinikalıq ordinatorlar toparınan shólkemlestirilgen brigada usı jıldıń 13-fevral sánesinde Nókis rayonınıń alıs aymaǵı bolǵan Qırantaw APJ ǵa bardı. Ondaǵı tiykarǵı maqset, 14 jasqa shekemgi balalardıń salamatlıǵın tekseriw, tuwma nuqsanlı balalardı erte anıqlaw hám hámiledar hayallardıń salamatlıǵın tekseriw, hámiledar hayallarǵa salamat perzentti dúnyaǵa keltiriw ushın zárúr medicinalıq másláhátler beriwden ibarat.

Shıpakerler brigadası shańaraqlıq poliklinikada 100 ge shamalas balalar hám 50 ge shamalas hámiledar hayallardı medicinalıq tekseriwden ótkerdi. Medicinalıq tekseriw dawamında tuwma nuqsanı bar balalarǵa Qaraqalpaqstan mediicina institutı klinikasında emleniwi ushın jollamalar berildi.
Sol arqalı brigada xalqımızǵa joqarı dárejedegi medicinalıq járdem kórsetiw hám olardıń densawlıǵın jaqsılıw baǵdarında áhmiyetli jumıslardı alıp barmaqta. Medicinalıq tekseriwler arqalı xalıq arasında medicinalıq bilimdi arttırıw hám dáslepki medicinalıq tekseriwlerdiń áhmiyetin jáne de joqarılatıwǵa erisildi.
Bunnan keyingi sapar Moynaq rayonına barıw rejelestirilgen hám keń kólemde dawam ettiriliwi maqset etilgen.

Qaraqalpaqstan xabar agentligi