Sanlı texnologiyalar ministri Sherzod Shermatovtıń basshılıǵındaǵı ministrlik delegaciyası “Oracle” korporaciyası basshılıǵı atqarıwshı vice-prezidenti Saymon De Monfor Uoker hám úlken vice-prezident Cherian Vargaze menen ushırasıw ótkerdi.

Ushırasıwda Ózbekstnda turıp «Oracle» kompaniyasınıń Oraylıq Aziya hám ǴMDAdaǵı jumısın keńeytiw perspektivaları, sonday-aq, bulıtlı texnologiyalar tarawındaǵı birge islesiwdiń múmkin bolǵan baǵdarları dodalandı.
Ushırasıw dawamında Ózbekstan delegaciyası mámlekettiń texnologiya kárxanaları ushın tiykarǵı abzallıqların kórsetti. Olarǵa qolaylı isbilermenlik ortalıǵı, IT tarawınıń mámleket tárepinen qollap-quwatlanıwı, rawajlanǵan sanlı infrastruktura hám maman kadrlardıń úlken rezervi kiredi.
Ózbekstanda, ásirese, maǵlıwmatlar injenerligi hám bulıtlı texnologiyalar tarawında joqarı mamanlı injenerler tayarlawǵa ayrıqsha itibar qaratıladı. Bunnan tısqarı, IT-qánigelerdiń shet tillerin joqarı dárejede biliwi mámlekettiń xalıqaralıq kompaniyalar ushın ózgesheligin hám básekige shıdamlılıǵın jáne de arttırmaqta.
“Oracle” wákilleri Ózbekstanda, ásirese, bulıtlı infrastruktura hám qosımshalar menen baylanıslı tarawlardaǵı bazar imkaniyatların úyreniwge úlken qızıǵıwshılıq bildirdi.
“Oracle” menen potencial birge islesiw Ózbekstannıń jetekshi IT-xab sıpatındaǵı poziciyasın jáne de bekkemleydi hám aldıńǵı texnologiyalardıń engiziliwin xoshametleydi. Zamanagóy sheshimlerdi qollanıw sanlı ekonomikanı rawajlandırıw, joqarı mamanlıqtaǵı jumıs orınların jaratıw hám mámlekettiń dúnya bazarındaǵı básekige shıdamlılıǵın arttırıwǵa xızmet etedi.

ÓzA