Ádettegidey jumısta islep otırǵan edim. Ómirlik joldasımnan xabar keldi. «Pálenshe apa emlewxanaǵa túsip qalıptı. Yapon tilin onsha jaqsı bilmegeni ushın awdarmashılıq etip qaytsam bola ma!» degen mazmunda. Barıp keldi.
Qaytqannan keyin telefonda jaǵdaydı soradım. Jası 30 dan ótken eki perzenti bar hayal. Tokioda Yapon tili mektebinde oqıp isleydi. Túngi 23:00 den azanǵı 8:00ge shekem dúkanda jumıs isleydi. Dúkannan shıǵıp oqıwǵa baradı. Oqıw 13:30 tamamlanadı, 15:00 den 22:00 ge shekem bir kárxanada isleydi. Kóz aldıńızǵa keltirip atırsız ba! Uyqılaw, dem alıw degen zatlarǵa waqıt joq. Bunday rejimde hár qanday adam kesel bolıp jıǵılıwı tábiyǵıy!
«Biyshara turmısı uqsamay perzentlerin ayaqqa qoyıw ushın bir ózi háreket etip atır eken dá, ákesi, ájaǵası joqpa eken», dep oylap tursam, kúyewi de bar eken. Mayıp ta emes, ruwxıy kesel de emes, tórt múshesi de saw kúyewi bar eken. Bul gápti esittim de, tamam boldım. Hayalı Yaponiyada qulday jumıs islep aqsha jiberip atır, kúyewi Ózbekstanda balaları menen qalıp múddetli tólewge úy, mashina alıp ház etip júr.
Qayinene-Qayınata: «Kelin, siz epshilsiz. Kúyewińiz sál awır jumıslarǵa bolmaydı», dep Yaponiyaǵa jiberipti. Hayranman! Esitiwimizshe, tek ǵana Yaponiyada bunday táǵdirler bir neshe eken. Rossiya, Túrkiyalardı aytpay-aq qoyaǵoyaayın.
Haw, ar máselesi ne bolmaqta erkekler! Namıs ne bolmaqta! Qashannan hayalın, anasın, ájapasın, qarındasın shetke jiberip aqshasın hújdansızlarsha paydalanıp otırıw ápiwayı jaǵdayǵa aylandı!
Bir waqıtları erkekler hayalın Ózbekstanǵa taslap, jıllap shette júriwin de sińire almaytuǵın millet edik. Endi bolsa, kerisinshesine de kónligiwimiz kerek pe! Hasla.
Balalıǵımda, bir qońsımızdıń balası jańadan úylengen edi. Ákesine «Rossiyaǵa ketemen», degenin esitip qalǵan edim. Sonda ákesi: «Rossiyaǵa ketseń keteber dá, hayalıńdı kimge taslap keteseń!» degen edi. Sol jigit Rossiya haqqında basqa gáp ashpaǵan edi. Qısqa múddetke, yamasa birge alıp ketiwde mashqala joq. Biraq, shańaraq institutına bunday zıyan keltirmeyik, bereket tapqırlar.
«Xabar.uz» materialları tiykarında tayarlandı.

Qaraqalpaqstan xabar agentligi