Qanlıkól rayonı Mádeniyat orayında ózbek ádebiyatınıń ullı tulǵası, shayır, danıshpan, Zahiriddin Muhammed Baburdıń 542 jıllıǵı múnásibeti menen ádebiy keshe shólkemlestirildi.
Ilajǵa Respublika ruwxıylıq hám aǵartıwshılıq orayı rayonlıq bóliminiń baslıǵı A.Turımbetov, tiyisli taraw wákilleri, mektep oqıwshıları qatnastı.
Ilaj dawamında Zahiriddin Muhammed Baburdıń ómiri hám basıp ótken jolı, shayırdıń ǵázzel, rubayı hám basqa ilimiy-ádebiy miyrasları menen tanıstırıldı.
Álbette, túrkiy ádebiyattıń eń belgili wákilleriniń biri, óziniń unamlı jumısları hám kúshli siyasatı menen dúnya tariyxında óshpes iz qaldırǵan ullı patsha hám shayır Zahriddin Muhammed Babur ádebiyattanıwshı, tariyxshı ilimpaz hám shayır sıpatında xalqımızdıń ruwxıy mádeniyatı tariyxında múnásip orın iyelegen.
Babur óziniń áskeriy talantı hám siyasiy ziyrekligi menen 1526-jılı Hindstanda Baburiyler dinastiyasına tiykar salıp, Hindstan tariyxında jańa dáwir baslandı – oraylasqan mámleket qurıldı, mádeniyat hám ilim rawajlandı.
Baburdıń “Baburnama” shıǵarması óz dáwiriniń siyrek ushırasatuǵın tariyxıy hújjeti bolıp, onda sol dáwirdiń siyasiy hám jámiyetlik turmısı tolıq súwretlengen. Sonday-aq, onıń ǵázzelleri hám rubayıları ózbek ádebiyatınıń dúrdanalarınan esaplanadı. Babur parsı hám túrkiy tillerinde dóretiwshilik penen shuǵıllanǵan, ádebiy miyrasında tábiyat, watan hám turmıstıń hár qıylı tárepleri sáwlelengen.
“Baburnama” tek ǵana tariyxıy shıǵarma emes, al tábiyattanıw hám geografiya boyınsha da áhmiyetli derek esaplanadı. Onda Oraylıq Aziya hám Hindstannıń ósimlik hám haywanat dúnyası haqqında bahalı maǵlıwmatlar berilgen.
Álbette, ózbek hám túrkiy xalıqlar, sonıń menen birge, dúnya ádebiyatında óz ornına iye máńgilik tulǵa – Zahiriddin Muhammed Baburdıń ádebiy miyrasların ele de tereń úyreniw, jas hám keleshek áwladlarǵa jetkeriw parızımız hám qarızımız bolıp tabıladı.
Ilajda oqıwshı-jaslar tárepinen shayırdıń dóretiwshiliginen saxnalıq kórinisler qoyıp berilip, ǵázzellerinen úzindiler oqıldı.

Qaraqalpaqstan xabar agentligi