1979-1989-jılları 15 mıńnan aslam oficer hám áskerlerdiń biymezgil ólimine sebepshi bolǵan Awǵanstandaǵı urıs xalqımız yadında umıtılmas tásirler qaldırdı. Bul urısqa sol dáwirdegi armiya qatarında xızmet etken qaraqalpaqstanlı kóp mıńlaǵan jigitler qatnasıp, olardıń qanshası qaza taptı. Awǵanstan elinde júrgizilgen urıs qaldırǵan jaraqatlardı keń jámiyetshilik búgingi kúni de umıtqanı joq.

Qaraózek rayonında Awǵanstan elinde áskeriy háreketlerdiń tamamlanǵanlıǵına 36 jıl tolıw múnásibeti menen bayram ilajı shólkemlestirildi.
Ilajǵa rayon hákiminiń orınbasarları, tiyisli mákemeler menen Awǵan urısı qatnasıwshıları qatnastı.
Onda shıǵıp sóylegenler jaslarımızdı ana-Watanǵa húrmet hám súyispenshilik ruwxında tárbiyalaw, tınıshlıqtıń qádirine jetiw, sol waqıtlardaǵı jawıngerlerimizdiń kórgen qıyınshılıqların aytıp ótti.
Bayram ilajında urıs maydanlarınan qaytpaǵan, usı tınısh zaman kúnlerge jetip kele almaǵan áziz insanlardıń esteligine gúl sheńberlerin qoyıp, olardıń ruwxlarına Quran oqıldı.
Ilajda rayon hákimligi tárepinen urıs veteranlarına bayram dasturxanları jayılıp, mádeniyat bólimi xızmetkerleri tárepinen koncert baǵdarlaması qoyıp berildi.

Adilbay Orazov,
Qaraqalpaqstan xabar agentligi sholıwshısı