Ájiniyaz atındaǵı Nókis mámleketlik pedagogikalıq institutında «Rektor kubogi» ushın «Debat» intellektuallıq oyınınıń final basqıshı bolıp ótti.
Ilaj jaslardıń kitapqumarlıq mádeniyatın hám oratorlıq sheberligin arttırıw, logikalıq-sociallıq oylaw, pikirlerin erkin jetkerip beriw dárejesin rawajlandırıw hám olardıń bos waqıtların mazmunlı ótkeriw maqsetinde shólkemlestirilgen.
Onda instituttıń jaslar máseleleri hám ruwxıylıq-aǵartıwshılıq isleri boyınsha birinshi prorektorı wazıypasın waqıtsha atqarıwshısı Q.Reymov shıǵıp sóylep, jaslar arasında intellektuallıq oyınlardı ǵalaba en jaydırıwdıń áhmiyetine toqtap ótti hám barlıq qatnasıwshılarǵa tabıslar tiledi, – deydi NMPI baspasóz xızmeti xatkeri I.Mátekov.
«Sociallıq tarmaqlardıń jaslar sanasına tásiri» boyınsha poziciyaların, ózleriniń bilim hám kónlikpeleri, toplaǵan maǵlıwmatları hám oratorlıq sheberliklerin kórsetti.
Oyınnıń final basqıshısı oǵada qızǵın túrde ótti. Onda Baslawısh tálim fakultetiniń «Primary» komandası «Rektor kubogi»niń jeńimpazı boldı.
2-orındı Tariyx fakultetiniń «Turan», 3-orındı Dene mádeniyatı fakultetiniń «Imperiya» komandası jeńip aldı.
Jeńimpaz komandalardıń aǵzalarına diplomlar, institut kásiplik awqamı komiteti atınan bahalı sawǵalar, sonday-aq, Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi tárepinen kitaplar sawǵa etildi.

Qaraqalpaqstan xabar agentligi