Prezidenttiń basshılıǵında ótkerilgen videoselektor májilisinde xalıqtıń arasında salamat turmıs tárizin úgit-násiyatlawda tek ǵana sport emes, al durıs awqatlanıw da úlken áhmiyetke iye ekeni atap ótildi.
Ótkerilgen úyreniwlerge bola, xalqımızdıń 44 procenti fizikalıq belsendi emesligi, 36 procenti durıs awqatlanıw qaǵıydalarına ámel etpeytuǵını anıqlanǵan.
Xalıqtıń arasında sobıqlı, dánli ónim, miywe-ovoshlardan paydalanıw keskin azayıp, duz hám qumshekerden paydalanıw artıp atırǵanı qáweterlerdi jáne de kúsheytedi. Aqıbetinde adamlardıń 56 procentinde artıqsha salmaq, 38 procentinde qan basımı menen baylanıslı mashqala bar. Juqpalı bolmaǵan kesellikler erte ólimge sebep bolmaqta.
Sonıń ushın, «Salamat insan – salamat millet» ulıwma milliy háreketi baslanadı.
Juwapkerlerge salamat awqatlanıw hám fizikalıq belsendilikti úgit-násiyatlaw menen hár bir shańaraqtı qamtıp alıw zárúr ekenligi kórsetip ótildi. Bul baǵdarda xalıqshıl hám tásirsheń sociallıq rolikler tayarlap, hár kúni oraylıq telekanallarda kórsetiw zárúr ekenligi atap ótildi.
Ulıwma, bul máselelerdi nızam dárejesinde bekkemlep qoyıw zárúr ekenligi, «Denetárbiya hám sport haqqında»ǵı nızamdı qısqa múddette pútkilley qayta kórip shıǵıp, búgingi zaman talaplarına beyimlestiriw zárúr ekenligi kórsetip ótildi.
Májiliste juwapkerler hám aymaqlar basshılarınıń esabatları, sport tarawı wákilleriniń usınısları tıńlandı.

ÓzA