Germaniyanıń Vayssenxaus qalasında sıylıq qorı 750 000 AQSh dollar bolǵan abıraylı shaxmat turniri óz juwmaǵına jetip kelmekte.

Keshe bul turnirde yarım final ushırasıwları bolıp ótip, olardıń birinde ózbekstanlı jas shaxmatshı Javohir Sindarov dúnya reytinginde ekinshi orında turǵan amerikalı grossmeyster Fabiano Karuanaǵa qarsı oyın ótkerdi.
Oǵada qıyın ótken ushırasıwdıń sheshiwshi armagedon partiyasında óziniń tájiriybeli qarsılasına jeńilgen Sindarov, búgin 3-orın ushın norvegiyalı jáhán chempionı Magnus Karlsen menen bellesedi.
Sonı aytıp ótiwimiz kerek, usı turnirdiń tańlap alıw basqıshında bul eki shaxmatshı óz-ara bellesip, onda Javohir Magnustı jeńip shıqqan edi.
Al, turnirdiń finalında bolsa, AQShlı Fabiano Karuana germaniyalı Vinsent Keymerge qarsı oyınǵa túsedi.

Adilbay Orazov,
Qaraqalpaqstan xabar agentligi sholıwshısı