Jınayat isleri boyınsha Beruniy rayonı sudınıń tergew sudyası I.Allaniyazov tárepinen rayondaǵı Amir Temur mákan puqaralar jıyınında ashıq kóshpeli sud májilisi ótkerildi.
Onda Ózbekstan Respublikası Hákimshilik juwapkershilik haqqındaǵı kodekstiń 125 (transport qurallarınan paydalanıw qaǵıydaların buzıw), 131 (transport quralların más halında basqarıw), 183 (mayda biyzarılıq), 187 (jámiyetlik orınlarda alkogol ónimin qabıllaw), 190-statyaları menen toplanǵan jámi 45 hákimshilik isi materialları mazmunı boyınsha kórip shıǵıldı.

Is materialları hár tárepleme úyrenilip, mayda biyzarılıq islegen 5 shaxsqa 3 sutkadan 10 sutkaǵa shekemgi hákimshilik qamaq jazası, Ózbekstan Respublikasınıń Hákimshilik juwapkershilik haqqındaǵı kodeksiniń 190-statyasında kórsetilgen huqıqbuzarlıqtı qaytadan islegen 1 shaxsqa 3 sutka hákimshilik qamaq jazası, al basqa huqıqbuzarlarǵa járiyma jazası tayınlandı.
Sud májilisi juwmaqlanǵannan soń, máhálle belsendilerine hákimshilik huqıqbuzarlıq hám onıń túrleri, jaza sharaları, ulıwma huqıqbuzarlıqlardıń huqıqıy aqıbetleri haqqında tolıq maǵlıwmatlar berildi.

Qaraqalpaqstan xabar agentligi