Usı jıl 11-12-fevral kúnleri Ózbekstan Respublikası investiciyalar, sanaat hám sawda ministri Laziz Qudratov Birlesken Arab ámirliklerinde ámeliy sapar menen bolıp, 2025-jılǵı Dúnya húkimetler sammitinde qatnastı.

2013-jıl BAÁ vice-prezidenti hám Bas ministri, Dubay húkimdarı Shayx muhammad bin Rashid Ol Maktumnıń baslaması menen shólkemlestirilgen bul ánjumannıń wazıypası global mashqalalardı sheshiw hám húkimetlerdiń keyingi áwladı ushın kún tártibin belgilew maqsetinde innovaciya hám texnologiyalarǵa itibar qaratıp, basqarıw keleshegin qáliplestiriwden ibarat ekenligin maǵlıwmat ornında atap ótiw zárúr.
Forumda shıǵıp sóylegen L.Qudratov mámleketimizge Oraylıq Aziyada investiciyalıq oraydıń abırayın isenimli iyelew, ekonomikanı ashıw hám global mashqalalarǵa qaramastan, turaqlı ósiwdi támiyinlew imkaniyatın bergen Ózbekstan rawajlanıwınıń házirgi basqıshına sáykes bir qatar ámeliy táreplerdi sanap ótti.
Atap aytqanda, sawda baǵdarların diversifikaciyalaw, regionallıq ekonomikalıq integraciya, JSShǵa aǵza bolıw jolındaǵı háreketler, ekonomikanıń joqarı texnologiyalı tarmaqların jedel rawajlandırıw máselesine toqtaldı. Sonıń ishinde, qayta tiklenetuǵın energiya derekleri, jasıl vodorod islep shıǵarıw, IT texnologiyaların rawajlandırıw, infrastruktura hám erkin ekonomikalıq zonalarǵa investiciya kirgiziw, sanlı transformaciya hám innovaciyalıq qollap-quwatlaw sıyaqlı ilajlar atap ótildi.
Ministr sessiya qatnasıwshılarınıń itibarın elimizde investorlar ushın qolaylı sharayatlardıń jaratılǵanına qarattı. Sırt el investiciyası haqqındaǵı nızam hújjetleri liberallastırılǵanı, mámleketlik aktivlerdi menshiklestiriw baǵdarlaması qabıl etilgeni, sanlı basqarıw hám elektron mámleketlik xızmetler engizilgeni hám bilimlendiriw sisteması jetistirilip atırǵanı haqqında sóz boldı.
Sammit sheńberinde delegaciyamızdıń basshısı húkimet isleri, ekonomika, energetika hám infratsruktura ministrleri Muhammad bin Abdulloh Al-Gergaviy, Abdulla bin Touk Al-Marriy, Suhayl Al-Mazruiy, sonday-aq iri regionallıq hám xalıqaralıq kompaniyalardıń basshıları menen ushırasıwlar ótkerdi. Sáwbetleskenler menen óz-ara tovar almasıw kólemin arttırıw, birgeliktegi investiciya joybarların ámelge asırıw, innovaciyanı engiziw, ekonomikanıń tiykarǵı tarmaqlarında óndiris qatnasıqların bekkemlewge baylanıslı áhmiyetli máseleler dodalandı.
Ulıwma, Birlesken Arab Ámirlikleri isbilermenleri tárepinen Ózbekstan bazarına kiriw, mámleketimizde jumıstı keńeytiwge unamlı kózqaras qálipleskeni, birge islesiwdi keńeytiwge isenim bekkemlenip atırǵanı jáne bir márte dálillendi.

ÓzA