Prezidenttiń usı jıl 2-yanvardan kúshke kirgen PQ-467-sanlı qararı menen tallaw hám izertlew strukturaları jumısın shólkemlestiriw boyınsha dúzilgen Muwapıqlastırıwshı keńes janında Izertlewlerdi qollap-quwatlaw qorı shólkemlestiriledi.
Bul haqqında Prezidenttiń 10-fevraldaǵı PQ-48-sanlı qararında belgilep qoyıldı.
Hújjetke muwapıq, qor qarjıları Tikleniw hám rawajlanıw qorında óz aldına ashılǵan esap betlerde toplanadı hám Muwapıqlastırıwshı keńes tárepinen belgilengen tártipte jumsaladı.
Qor qarjıları tómendegilerge qaratıladı, sonıń ishinde:
– muwapıqlastırıwshı keńestiń jumıs baǵdarları boyınsha izertlewlerdi ámelge asırıw;
– tallaw materialların tayarlaw hám izertlewlerdi ótkeriw ushın grantlar ajıratıw;
– sociallıq sorawlar hám jámiyetshiliktiń pikirin úyreniw boyınsha izertlewlerdi ámelge asırıw.
Qor qarjıları maqsetli hám nátiyjeli jumsalıwı ústinen qadaǵalaw Muwapıqlastırıwshı keńes tárepinen ámelge asırıladı.
Muwapıqlastırıwshı keńeske bolsa tómendegilerge ruqsat beriledi:
Qor qarjıların milliy hám sırt el valyutaların bank depozitlerine jaylastırıw;
– grantlar hám biyǵárez texnikalıq járdem quralların tartıw;
– fizikalıq hám yuridikalıq táreplerge tólem tiykarında izertlewler nátiyjeleri hám maǵlıwmatlar bazalarınan paydalanıw hám ilajlarda qatnasıw imkaniyatların beriw, -dep málimleme beredi xabar.uz saytı.

Qaraqalpaqstan xabar agentligi