Prezidentimizdiń «2024-2026-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında»ǵı qararı tiykarında aymaqlarda bir qatar jumıslar alıp barılmaqta.
Qarardıń orınlanıwınıń ámeliy kórinisi retinde Ámiwdárya rayonı Qańlı awılında jaylasqan 49-sanlı mámleketlik MShBSh rekonstrukciyalanıp paydalanıwǵa tapsırılǵanın atap ótiwge boladı. Jańa imarat 90 orınǵa mólsherlengen.
Balalardıń sapalı bilim alıwı ushın barlıq qolaylıqlarǵa iye bolǵan baqshanıń jańa imaratınıń qurılıs jumısları «Jumırtaw tex-ońlaw servis» JShJ tárepinen ámelge asırıldı, – deydi rayon hákimligi málimleme xızmeti bólimi.
Jańa imarattıń ashılıw saltanatında rayon hákiminiń orınbasarı G.Saburova shıǵıp sóyledi hám awıl xalqın barlıq sharayatlarǵa hám zamanagóy kóriniske iye baqshanıń jumıs baslaǵanı menen qızǵın qutlıqladı.
Sonday-aq, ilajda shıǵıp sóylegenler bunday jańa imaratlardıń barlıǵı mámleketimiz basshısınıń tálim-tárbiya tarawına qaratıp atırǵan itibarınıń nátiyjesi ekenin atap ótti.
Bul imkaniyat awıl xalqın sheksiz quwanıshqa bóledi.

Qaraqalpaqstan xabar agentligi