Sońǵı waqıtlarda egislik maydanlardı suwǵarıwda jumsalatuǵın suwlardı únemlew ushın tarawǵa engizilip atırǵan zamanagóy texnologiyalar jaqsı nátiyjeler menen is ónimdarlıǵın arttırıwǵa járdem bermekte. Nókis rayonındaǵı “Kattaǵar katlavan” nasos stanciyasında Qıtay mámleketinen zamanagóy 3 dana «Shenge» suw nasosları alıp kelinip qurıldı.
-Bul suw nasoslarınıń abzallıq tárepleri kóp. Atap aytqanda, hár saatta tek ǵana 27 kilovatt energiya jumsaydı. Bul nasos agregatlarına insan kúshi sarıplanıp, oǵan suw quyıw, zapravka islew jumısları alıp barılmaydı. Jańa agregatlar avtomatlastırılǵan bolıp, suw kólemi kemeygende avtomat tárizde óshedi. Eski agregatlar kóbirek qol miynetin talap etken bolsa, zamanagóy texnologiyalar bul jaǵınan da sezilerli jeńillik jaratpaqta.
Eski nasoslardı óshirgende qıstıń kúnlerinde suw qatıp qalıp, muzlap, truba jarılıw jaǵdayları kelip shıǵatuǵın bolsa, bunda nasostı óshirgende suw avtomatlastırılǵan tárizde tartılıp ketedi. Sonday-aq, 24 kilovatt quyash panellerin ornatqanbız. Quyash panelleriniń abzallıq tárepleri sonda energiyanı únemlep, nasoslardıń kem qárejet energiya menen islewinde júdá jaqsı nátiyje kórsetpekte, -deydi Qaraqalpaqstan Respublikası nasos stanciyaları hám energetika basqarması janındaǵı Nókis-Kegeyli rayonı aymaqlıq bólim baslıǵı A.Xojaniyazov.
Nasos agregatları házirgi waqıtta sınaw rejiminde islep turǵanlıqtan, aldaǵı waqıtlarda jáne de kóbirek alıp kelip iske túsiriw rejelestirilmekte.

Qaraqalpaqstan xabar agentligi