Qaraqalpaqstan medicina institutında «Baslanǵısh medicinalıq-sanitariyalıq járdem sistemasında endokrinologiyalıq keselliklerdiń profilaktikası, olardı erte anıqlaw hám emlewde multidisciplinar qatnas» atamasında ilimiy-ámeliy konferenciya ótkerildi.

Konferenciyanı Qaraqalpaqstan Respublikası Densawlıqtı saqlaw ministri M.Qurbanov ashıp berip, ótkerilip atırǵan konferenciyanıń áhmiyetine toqtap ótip, qatnasıwshılarǵa tarawda ámelge asırılıp atırǵan jumıslar boyınsha maǵlıwmatlar berildi.
Ilaj dawamında Akademik Yo.X.Turaqulov atındaǵı Respublikalıq qánigelestirilgen Еndikrinologiya ilimiy-ámeliy medicina orayınıń direktorı A.Alimov «Mámleketlik medicinalıq qamsızlandırıw mexanizmlerin ámeliyatqa engiziw» atamasında keń túrde prezentaciya isledi.
Sonday-aq, usı oray direktorınıń orınbasarı S.Faxrutdinova, bólim baslıqları A.Alieva, N.Alimova, úlken ilimiy xızmetkeri, medicina ilimleriniń doktorı Sh.Muratovalar mámleketlik qamsızlandırıw mexanizmlerin ámeliyatqa engiziw, baslanǵısh medicinalıq-sanitariyalıq mákemelerinde endokrin keselliklerdiń skriningi, diabettiń dáslepki jaǵdayınıń diagnozın qoyıw hám emlew, 2-tur qantlı diabet keselliginiń diagnozı, onı emlew hám dispanserlik qadaǵalaw, qantlı diabettiń 1-turın alıp barıw marshrutizaciyası, yod jetispewshiligi, onıń intellektke hám densawlıqqa unamsız tásiri, profilaktika jolları, semizlik hám metabolik sindrom, oǵan diagnoz qoyıw hám emlewdiń zamanagóy usılları, onıń reproduktivlik salamatlıqqa tásiri máseleleri boyınsha bayanatları menen shıǵıp sóyledi.
Konferenciya sheńberinde baslanǵısh medicinalıq járdemde endikrinologiya xızmetiniń rolin kúsheytiw, onıń nátiyjeliligin arttırıw hám nawqaslar ushın jáne de sapalı medicinalıq járdem kórsetiw jolları da dodalanıp, pikir-usınıslar bildirildi.
Konferenciya qatnasıwshıları taraw qánigeleri hám medicina tarawı ilimpazlarınan ibarat bolıp, olar ótkerilgen talqılawlarda sońǵı ilimiy-izertlewler hám innovaciyalıq sheshimler haqqında pikir alıstı.

Á.Jiyemuratov,
Qaraqalpaqstan xabar agentligi