Respublikamız aymaǵı boylap jawǵan qar úlkemiz xalqın sheksiz quwanıshqa bólew menen birge, olardı ádewir oyǵa taldırǵanı turǵan gáp. Sebebi, kópshilik puqaralardıń jumıslarǵa barıwı transport penen baylanıslı bolǵanlıqtan, eger, aymaqlarımızda qalıń qar jawsa kóliklerdiń júriwine sheklewler kirgiziledi. Bul bolsa, biziń hár birimizden jumıslarımızdı rejelestiriwdi talap etedi.
Bizler fevral ayınıń ekinshi on kúnliginde respublikamızda qanday hawa-rayı kútiletuǵınlıǵın biliw maqsetinde, Qaraqalpaqstan Respublikası Gidrometrologiya orayınıń birinshi dárejeli sinoptigi Axmed Atashovtan tómendegishe maǵlıwmat aldıq.
Fevral ayınıń ekinshi on kúnliginde hawanıń ortasha aylıq temperaturası norma átirapında bolıp, hawanıń temperaturası túngi waqıtları 0-5 gradustan -5-10 gradusqa shekem suwıqtı, kúndizgi waqıtları +3+8 gradus jıllıdan 0-5 gradusqa shekem suwıqqa ózgerip turadı.
Aydıń úshinshi on kúnliginde hawanıń temperaturası túngi waqıtları -10-15 gradustan, kúndizgi waqıtları -2-7 gradusqa shekem tómenleydi.
Aylıq jawın-shashın muǵdarı norma átirapında (norma 7-15mm) boladı.
Ay dawamında waqtı-waqtı menen qar aralas jawın-shashın bolıwı kútilmekte.
Sonlıqtan, puqaralarımız hawa-rayı qolaysız keledi dep qáweterlenbese de boladı.

Adilbay Orazov,
Qaraqalpaqstan xabar agentligi sholıwshısı