Pármanǵa bola, 2025-jıl 1-aprelden «Jaslar dápteri» qorları arqalı, 2025-jıl 1-sentyabrden bolsa «Hayal-qızlar dápteri» qorları arqalı tólenetuǵın bir mártelik materiallıq járdemler ornına kem támiyinlengen shańaraqlar ushın názerde tutılǵan napaqalar tólenedi.

2025-jıl 1-maydan «Sociallıq dápterler» qorları esabınan emlew hám xirurgiyalıq operaciiyasın ótkeriw qárejetleri Mámleketlik medicinalıq qamsızlandırıw qorı arqalı qarjılandırıladı.
2025-jıl 1-aprelden Qaraqalpaqstan Respublikası hám Xorezm wálayatında járdemge mútáj bir márte beriletuǵın materiallıq járdemniń ornın usı aymaqlarda jasawshı Kámbaǵal shańaraqlar reestrine kirgizilgen shańaraqlarǵa turaq jayında artezian qudıq qazıw, suw nasosların ornatıw hám ishimlik suw filtrlerin satıp alıw qárejetlerin qaplaw ushın subsidiya ajıratıw tártibi engiziledi.
Onda subsidiya qárejetlerdiń 90 procenti, biraq BEMniń 30 esesinen kóp bolmaǵan muǵdarda ajıratıladı.
2025-jıl 1-maydan erkinen ayırıw orınlarınan azat etilgen shaxslarǵa BEMniń 6 esesi muǵdarındaǵı bir mártelik napaqa pulı «Insan» sociallıq xızmetler orayları arqalı tólenedi.
Rayon (qala) hákimlikleri janında «Infrastruktura hám sociallıq turaqlılıq» qorları shólkemlestiriledi.

Qaraqalpaqstan xabar agentligi